Cebuano News: PGMA mipalig-on sa programa sa gobyerno alang sa kaayohan sa mga tawong may kapansanan
By Lanie Pitao-Tupaz
Si Presidente Glroia Macapagal Arroyo mimando na pagpabalhin sa National Council for the Welfare of Disabled Persons (NCWDP) gikan sa Department of Social Welfare and Development (DSWD) Office ngadto sa Office of the President aron mapalig-on pa ang programa sa gobyerno alang sa mga tawong may kapansanan.
Si Executive Secretary Eduardo Ermita miingon nga si Presidente mipasunod sa pagbalhin pinaagi sa Executive Order No 676 aron matotokan ug mapauswag ang aksyon sa gobyerno ug ang mga programa pangkalamboan alang sa mga tawong may kapansanan ug paghatag sa mga serbisyo ngadto sa maong sektor.
Si Ermita miingon nga si Presidente milagda sa EO 676 niadtong Oktobre 25 ubos sa rekomendasyon sa pipila nga mga non-government organizations nga nanginano sa mga tawong may kapansanan sa panghunahuna.
Aron maseguro ang pagtan-aw ug makita ang epektibo ug maayong implementasyon sa gobyerno sa mga panaad niini alang sa mga espesyal nga mga programa alang sa mga tawong may kapansanan sa panghunahuna, gikinahanglan gayod ang pagbalhin sa NCWDP gikan sa DSWD ngadto sa OP, matod pa ni Presidente.
Ubos sa EO 676, ang Presidente magtudlo ug pribadong tawo nga mangulo sa NCWDP, samtang ang DSWD secretary magpadayon pagpanginano sa maong ahensiya.
Ang NCWDP namugna nga nag-unang ahensiya kinsa maoy maghimo ug mga palisiya ug makighilambigit sa mga kalihokan sa mga ahensiya nga may kalabotan sa kauswagan ug kalamboan sa mga tawong may kapansanan. (PIA Biliran) [top]
