Cebuano News: Mikuha ug P9B pamuhunan sa agrikultura ang pagbisita ni PGMA sa Espanya
By Lanie Pitao-Tupaz
Manila (7 December) -- Ang upat ka adlaw nga pagbisita ni Presidente Gloria Macapagal-Arroyo sa Espanya mibunga sa iyang pagkadala ug P9 ka bilyon nga bag-ong pamuhunan alang sa agrikultura pa lamang.
Duha sa mga dagkong proyekto mao ang tag $200 ka milyon alang sa pagkaon, pangisdaan, ug produksyon sa jatropha.
Ang proyekto sa pagkaon ug pangisdaan ipaagi sa gobyerno-sa-gobyerno nga kasabotan aron makakuha pa ang Pilipinas ug mga grants gikan sa gobyerno sa Espanya ilabi na alang sa kalamboan sa mga programa sa pangisdaan ug agrikultura.
Ang memorandum of agreement kon MOA nga gilagdaan sa ministry of agriculture sa Espanya ug sa Pilipinas mihatag usab ug kahigayonan sa nasud Pilipinas pagkuha sa mga teknolohiya sa Espanya kabahin sa pagproseso sa mga duma, prutas, ug utanon, sumala pa ni Agriculture Secretary Arthur Yap.
Sa lain pa nga MOA, ang Bionor sa Espanya mamuhunan usab ug $200 ka milyon alang sa pagpalambo sa 100 ka ektarya nga yutang pang-agrikultura sa Laguna ug Palawan alang sa produksyon sa jatopha feedstock, ingon man usab sa pag-establisar sa planta sa jatropha extraction ug distillery.
Ang MOA gilagdaan nila Anton Pradera, presidente sa CIE Automotive, Alfonso Ausin, CEO sa Bioner, ug Secretary Yap.
Ang technical cooperation office sa Espanya (Agencia Espanola cooperacion internacional) ug ang DA milagda usab ug MOA alang sa padayon nga pagdumala sa mga kakuhaan sa kabaybayonan sa Bicol ug Caraga nga makapugong sa sobrang pagpangisda ug pagkaubos sa mga resources sa kadagatan sa duha ka mga rehiyon.
Ang mga kalihokan niini nga proyekto ubos sa MOA maglakip sa coastal resource management planning, training ug on-site coaching alang sa posibling mamahimomg proyekto nga pakabuhian.
Ang kasabotan naglakip usab sa panawagan pagpalig-on sa agro-industrial sector sa Bicol ug Caraga pinaagi sa paghimo ug agro-industries sa teknolohiya sa abaca, lubi, pinya, ug balanghoy
Ang mga makina alang sa pagroseso sa mga produkto ug pagbansay sa mga trabahador sa planta alang sa mga de kalidad nga produkto lakip usab sa maong kasabotan.
Lain pa nga kasabotan tale sa DA ug rehiyon sa Basque naglakip sa hiniusang partisipasyon sa reaserch projects sa biotechnology, food technology, padayon nga pagdumala sa marine environment ug aquaculture.
Ang DA nag-awhag sa pagpalambo sa mariculture park sa Casiguran, Aurora alang sa implementasyon niini nga kasabotan, matod pa ni Yap.
Ang lungsod sa Baler, importanteng bahin sa kaagi sa Espanya tungod kay kini mao ang lugar sa pinakaulahing paglaban sa Espanya panahon sa giyera tale sa Pilipinas ug Espanya.
Ang MOA tale sa DA ug Fundacion Codespa naghatag ug lig-on nga kooperasyon sa pag-ila sa mga prayoridad nga lugar alang sa microfinance sa mga mangirisda ug mag-uuma ug paghatag sa pagbansay ug teknolohiyang pang-agrikultura sa Espanya.
Ang Codespa Foundation sa Espanya una nang mihatag ug proyekto sa microfinance ug greenhouse dinhi sa Pilipinas diin sila migahin ug 1.6 milyones euros ug 30,000 euros sa business packaging center.
Sumala pa ni Yap, sila naglaom nga kini nga mga programa masundog sa sektor sa agrikultura ug pangisdaan ug ma-implementar sa 2nd quarter sa 2008.
Ang MOA sa Abengoa Bioenergy naghatag ug hinabang sa pagkultibar sa balanghoy isip biofuel feedstock, pagdesinyo sa mga makinang suplay nga gamiton sa plantasyon sa balanghoy, ug ang pagtoon sa posibilidad nga makatukod ug planta sa bioethanol sa nasud, dugang pa ni Yap.
Ang mga partido nga milagda sa MOA nagkasabot sa pagporma ug technical working group nga managtagbo sulod sa 60 ka adlaw gikan sa paglagda sa MOA. (PIA Biliran) [top]