Cebuano News: Pres. Arroyo mimando og madaling kasulbaran sa kaso sa Sumilao
By Erna S. Gorne
Manila (12 December) -- Si Presidente Gloria Macapagal-Arroyo mimando sa Department of Agrarian Reform (DAR) sa madali nga pagsulbad sa kasamok sa yuta nga naglambigit sa mga mag-uuma gikan sa Sumilao, Bukidnon.
"Importante pud nga matubag ang mga reklamo ang mga pobre, lakip nga ang mga mag-uuma nga nagkinahanglan ug tabang para sa panginabuhi og hustisya," matud niya sa iyang inablihan nga pamulong atol sa National Security Council Cabinet nga tigum dili pa lang dugay.
Ang Sumilao nga mga mag-uuma nagtapos sa ilang duha ka bulan nga martsa gikan sa ilang mga panimalay sa Mindanao hangtud sa Malacanang aron sa pagdala sa ilang mga problema ngadto sa pagtagad sa nasyonal nga gobierno.
Hinoon, sila nahisagmuyo sa pagkahibalo nga walay opisyal ang mitagbo kanila didto. Ni gihatagan sila sa pagtugot sa pagsulod sa palibot sa Palasyo.
Ang mga mag-uuma sa Sumilao, mga membro sa Higaonon nga tribu, nangayo sa pagpahibalik ngadto sa ilang pagpanag-iya sa mga yuta ubos sa programa sa agrarian reform sa gobierno.
Ang gikagubtan nga propriedad, unang gipanag-iya sa panimalay sa Quisumbing, nahatagan sa pagtugot alang sa "conversion" and kini dugay nang nabaligya ngadto sa San Miguel Food Corp., diin kini gikatahu nga giplanuhan sa pagtukod og usa ka baboyan diha sa 144 ka hektarya nga yuta.
Sumala sa tahu ni Agriarian Reform Secretary Nasser Pangandaman ngadto sa Presidente nga iyang gihatagan ang Sumilao mga mag-uuma og ang San Miguel sa pag-sumiter hangtud sa Lunes sa ilang mga position papers alang sa DAR aron sa paghimo og giya kon aduna bay paglapas sa "conversion" nga sugo kalabot sa yuta. (PIA-Southern Leyte) [top]
