Cebuano News: Anak nga lalaki ni Qaddafi misumbalik sa suporta sa Libya ngadto sa gobyerno sa proseso sa kalinaw sa Mindanao
By Rodrigo S. Victoria
Manila (14 December) -- Si Presidente Gloria Macapagal-Arroyo miabi-abi nganhi sa Pilipinas sa kamagulangan nga anak nga lalaki ni Presidente Muammar Al-Qaddafi sa Libya nga mihimo ug pagbisita kagahapon sa buntag sa Malacaņang.
Ang Presidente mipahayag sa iyang pagpasalamat ngadto kang Saif Al-Islam Muammar Al-Qaddafi, presidente sa Qaddafi Foundation for Charity Association and Development, nga misumbalik sa padayon nga suporta sa Libya ngadto sa mga inisyatibo sa kalinaw ug kalambuan sa gobyerno sa Pilipinas ngadto sa Mindanao.
Kauban sa mitambong diha sa pagbisita sa batan-ong Qaddafi sa Presidente mao sila si Executive Secretary Eduardo Ermita, National Security Adviser Norberto Gonzales, Presidential Adviser on the Peace Process Jesus Dureza, Libyan Ambassador to the Philippines Salem Adam ug Libyan Embassy Charge d'Affaires Sadek Osman.
Si Dureza nagkanayon nga ang pagbisita ni Qaddafi nagpakita sa importante nga papel sa Libya sa nagpadayon nga mga paningkamot aron sa pag-establisar ug permanente nga kalinaw sa Mindanao.
Ang Libya ang dako ug suporta sa mga paningkamot sa kalinaw sa Mindanao sukad pa sa 1976 Tripoli Agreement nga gilagdaan tale sa gobyerno ug sa Moro National Liberation Front (MNLF0 sa Tripoli, Libya.
"Ang Libya ang magpadayon sa pagtabang kanato sa mga paningkamot sa kalinaw ug kalambuan, ilabi na sa katimugan sa Pilipinas.
Kini ang sumpay sa nasugdan niadtong 1976," matud pa ni Dureza.
Ang Presidente sa sayo pa mitudlo sa suporta sa Libya ngadto sa gobyerno sa Pilipinas nga naglakip sa ilang tabang sa pagduso sa proseso sa kalinaw sa Mindano ngadto sa iyang pagkatapos.
Ang gobyerno usab ang nagtabang sa implementasyon sa nagkalain-laing tabang sa langyaw nga mga proyekto sa inprastraktura ug mga inisyatibo sa katimugang Pilipinas, lakip na sa pag-umol sa Shariah (Islamic nga balaud) nga mga korte sa Autonomous Region in Muslim Mindanao (ARMM) nga nahisubay sa mga balaud sa Pilipinas ug sa mga probisyon sa 1976 Tripoli Agreement. (PIA-Biliran) [top]
