Manila (16 December) -- Usa ka kahugpongan sa mga overseas Filipino workers (OFWs) sa tibuok kalibutan ang misaway pagka Biyernes sa "makapa-uy-og ug kadudahan nga tumong" luyo sa pagpahigayon ingon man ang resulta sa Pulse Asia opinion survey nga nagtumbok matud pa ni Pangulong Arroyo isip kina-kurakotan nga Pangulo sa kasaysayan sa Pilipinas.

Ang Global Alliance of OFWs, Inc., pinaagi sa usa sa ilang mga nagtukod nga lideres nga si Michael Say, ug ang Crusade for a Better Philippines Inc. Secretary General Jess Perico, mihingalan sa maong survey nga usa ka propaganda batok kang Pangulong Arroy, ug mitataw sa pipila ka mga pangutana nga daw nagpakilimos og mga tubag.

Si Say maoy chairman sa Global Alliance of OFWs (GAOI), usa ka organisasyon nga nagsilbing payong sa daghang mga OFW associations sa lain-laing mga kanasuran.

Ang survey gisugo ug gibayran ni kanhi Senador Sergio Osmena III, usa ka nailhan na nga tigsaway sa Presidente ug campaign manager sa Genuine Opposition (GO) sa miaging eleksyon sa Mayo.

Mga opisyales sa GAOI nag-ingon nga ang mga nanubag sa naasoy nga pagsuhid, ang ilang mga edad ug mga pinuy-anan, angay nga masayran kay kini mahinungdanon nga mga butang diha sa pagpahigayon og opinion poll survey.

"Importante kining mga butanga, sanglit ang bahin sa pangedaron dunay kalabutan sa resulta unya. Kadaghanan nga bag-o pang na-hamtong wala pa makamat-ngon sa gibug-aton ug mga panghitabo sa mga corruption issues sa nangaging mga kanhi Presidente," nagkanayon si Say ug Perico.

"Ang mga dapit nga gipuy-an sa mga nanubag importante sab kay lagmit didto lamang kini gihimo sa mga dapit nga daghan ang oposisyon," dugang pa sa duha.

Ang duha ka mga OFW leaders nag-ingon usab nga mahinungdanon gihapon nga masayran kon giunsa pag-gambalay ang mga pangutanan ug "kinsa ang nagbayad sa survey."