Ni Jordan Britos

General Santos City (27 December) -- Makadawat matod pa ug suportang pinansyal gikan sa Department of Social Welfare and Development ang mukabat 123,000 nga mga pobreng pamilya sa pipila ka mga lugar sa nasud sugod sa sunod nga bulan.

Sumala pa nga 800 pesos ang maangkon matag bulan sa mga kabus nga pamilya aron nga matod pa mahagit ang mga ginikanan nga dad-on sa mga health centers ang ilang mga anak ug patungha-on usab sa mga pampublikong tulunghaan

Ang makabenepisyo sa maong programa mao lamang ang mga pamilyang adunay tulo pataas nga mga anak, ug maka-income lamang ug 15 mil matag tuig.

Kini ilawom sa programang "ahon pamilyang pinoy" nga tumong ang pagpakgang sa nagpadayong kalisod nga hinungdan usab nga makaangkon ang mga kabatan-onan sa mabaw lamang nga edukasyon, pagtaas sa ihap sa maternal ug infant mortality, ug pagtaas sa kaso sa malnutrisyon ug child labor sa mga pobreng katawhan.

Punto sa maong programa ang mga lugar sama sa munisipalidad sa Esperanza ug Sibagat sa Agusan del Sur, Lopez Jaena ug Bonifacio sa Misamis Occidental; ang mga syudad sa pasay ug Caloocan sa Metro Manila, kung asa 6,000 ka mga lumulupyo ang gituohang maka-benepisyo.