Manila (12 July) -- Iginpahayag kakulop ni Social Welfare and Development Secretary Esperanza I. Cabral nga maabot na hin 80 porsyento han mga benepisyaryo ha Metro Manila han programa nga "Pantawid Kuryente: Katas ng VAT" an nakakuha na han ira P500 nga subsidiya ha kabaraydan.

Sigun han rekord han Hunyo 28, 2008, maabot 650,250 na an natagan han mao nga subsidiya ha Metro Manila, Region III, ngan Region IV-A. An kantidad en naabot na hin P325,125,000 nga naipanhatag ngadto hin 432,737 nga mga benepisyaryo ha NCR; 66,828 ha Region III; ngan 150,685 ha Region IV-A.

Samtang, nagpirmahay hin usa nga Memorandum of Agreement an DSWD ngan an National Electrification Administration (NEA) hadton Hunyo 12, 2008 kon diin nagpasa an mao nga departamento hin P500 milyones ngadto ha NEA agud ipanhatag ngadto hin mga kooperatiba hin kuryente.

Nakarawat han NEA an P500 milyones nga subsidiya ha kuryente tikang ha DSWD ngan nagpagawas na ini hin mga aludaydayan ngadto hin 119 nga electric cooperatives para han implementasyon han programa nga "Pantawid Kuryente: Katas nga VAT."

An National Electrification Administration, usa nga government-owned and controlled corporation (GOCC) en mayda katungod pagsuperbisar hiton mga kooperatiba hin kuryente palibot han nasud.

Sumala kan NEA Administrator Edita S. Bueno, gin-imbitar gihapon nira an mga representante han mga electric cooperative para igpatin-aw an mga isyu ngan iba pa nga mga butang bahin han implementasyon han programa.

Sugad man, gintikangan na han NEA an pagbukalas han subsidiya ngadto han electric cooperatives para han kanan konsumidor kabaraydan ha kuryente tinikangan han Hunyo 2008.

Makikita an igin-iban nga kantidad dida hiton kanan benepisyaryo billing statements hiton Hulyo, pahayag han NEA.

Mahihinumduman nga iginmando ni Pangulo Gloria Macapagal-Arroyo an paghatag hin P500 nga subsidiya ngadto hin mga konsumidor kan kanay konsumo hin kuryente en diri malahos hin 100 kilowatt hours para han mga kabaraydan nga magtatapos Mayo 2008.