ni Alice Nicart

Manila (16 July) -- Andam daw an Pilipinas ha pag-atubang ha ano man nga ayat han paghingulang han gasolina ug pagkaon tungod na ngahaw han mga reporma nga iginpatuman han renda ni President Gloria Macapagal-Arroyo.

Amo ine an pahayag mismo ni Pres. Arroyo durante han iya pagkarawata ha Malacanang han mga delegado han 4th Ambassadors, Consults Generals and Tourism Directors Tour (ACGTDT) kakulop nga adlaw.

Sumala pa niya, gintagan daw han goberno hin igo nga mga paghag-id an mga tag-implementar han mga programa ug pinondohan han goberno ine nga mga tawo ug an ira mga pag-aram agud hira in makaamkon hin eksakto nga kabatiran ha pagtapo han ano man nga ayat han panginabuhi. Nagsiring pa daw an Presidente, nga tungod hine nga ipinanmuhunan han goberno, nahimo nga naminus-minusan, kun di na man, an aton sistema ha nasud an may pinaka maupay nga pagtagad han problema han pagkaon ug gasolina.

Idinugang pa han report, nga ha kabug-usan nakasiring pa daw an Presidente nga kun asay na man la, an kanan kalibutan problema ha pagtaga ekonomiya ina waray gud talis nga pakapakalas ha Pilipinas tungod han kaandaman ug kabatiran han mga opisyales ug mga tag-implementar han mga reporma ug programa.

Lugod pa ngani, igindasig pa daw han Presidente, nga an iya marig-on nga desisyon ug pag-imposar hin mga reporma in nakadugang pa lugod han kita han goberno nga amo man yana an nagagamit ha pagkomponer o pag-upay hin mga mehores, tulay, kakalsadahan, pier, airports ug iba pa nga pasilidad bisan pa an pagtukod hin dugang pa nga mga panarabahuan.

Tungod pa daw han dugang nga kita han goberno, damo na daw an nagagamit ha edukasyon ug panlawas nga serbisyo para han kadam-an nga Pilipino.