Waray-Waray News: Ha Pilipinas an may pinakabarato nga bugas
ni Alice Nicart
Manila (16 July) -- Ha luyo han pasigi nala nga pag-umento han presyo han bugas ha bug-os nga kalibutan, Pilipinas an may pinakabarato nga bugas. Amo ine an siring ni President Gloria Macapagal-Arroyo kakulop ha Malacanang, durante han iya pakipagharampang hin mga taga langyaw.
Sering niya, ha Thailand, tag-P56 daw it kilo hit bugas, ha Vietnam-P67. Ngani, an duha daw nga nasud an pinapalitan han Pilipinas hin imported nga bugas, kundi iginbabalidya la ine dinhe hin tag P18.25 ug P25.00 kada kilo hiton National Food Authority (NFA). Mayda daw daman iginbabalidya nga commercial rice nga tag P35.00 ngan ginkokonsodirar pa daw ine han Presidente nga grasya pa, kay commercial gud ine.
Igindasig pa daw ni Pres. Arroyo ha iya mga bisita, nga mas habubo la gihap an presyo dinhe ha Pilipinas han bugas, kontra han iba nga nasud ha Asya.
Ngan, sering pa niya an pag-hatag han eksakto nga panginahanglan han pagkaon ug an pag-imot-imot han ngan pag-igol han gasoline in nangunguna yana han kanan goberno mga importante nga programa. Solido daw gud an iya plano nga makab-utan an pagmalaka-hatag ha mga tawo han eksakto nga pagkaon han bugas. Iya na daw gintagan kamanduan an International Rice Research Institute (IRRI) may duha na ka-tuig an naglabay, nga mag-aram gud agud mapaumento pa an ginbabari nga humay. (PIA Eastern Samar) [top]
