Waray-Waray News: P478-M igin-gahin para han pangupay han kakalsadahan ha Eastern Samar
By Alice Nicart
Borongan (16 July) -- Igin-gahin na in maabot P478-Milyon de pesos para han pag-upay han batsihon nga kakalsadahan tikang Guiuan ngadto Taft han probinsya han Eastern Samar.
Amo ine an report nga iginhatag ni anay Political Adviser, Gabby Claudio kakulop ha Calbayog, Western Samar, diin upod hiya han grupo ni President Gloria Macapagal-Arroyo.
Siring ni Claudio, tim-os an tinguha han Presidente nga matuman an progreso han kabug-usan nga isla han Samar tipakadto ha pagigin usa nga target nga destinasyon han mga turista. An Samar daw, komo ikatulo nga pinakadako nga isla sunod han Luzon ug Mindanao in may-ada man daman kapas umursa sugad han iba nga mga progresibo nga mga lugar, sugad han Bohol ug Cebu.
Idinugang pa han report nga ine nga P478-M in pondo para han pag-upay han 160-ka kilometro nga kalsada sakop han Taft ngadto ha Guiuan.
Nagsiring pa hi Claudio nga ine nga pondo in andam na gamiton, ngan hiya ug an Presidente in labis nga pinasalamatan ni Gov. Ben Evardone nga nakadto daman mismo ha Calbayog kakulop.
Ine nga kalsada in nagdurot hin kuri han mga biyahero tungod han hura nga batsi nga ginbabansagan na nganin nga sugad-sugad hin sungkaan na daw. Naiban-ibanan ine ha di pala maiha han igsugo ni Gov. Evardone an panmutangi nala anay hin aras-as samtang dire pa nagtitikang an trabaho han Departmet of Public Works and Highways. Yana nga pinunduhan naman han Presidente pinaagai han General Appropriations Act of 2008, matutuman na ang hingyap han kadam-an nga mga Eastern Samareno nga humamis na an kakalsadahan didi nga dapit ngan magma himyang na an pagbiyahe. (PIA-Eastern Samar) [top]
