Waray-Waray News: PGMA iginpapaudong an pagkonbertir han mga umhanon nga tuna
By Alice Nicart
Borongan (19 July) -- Hin-pagkadamo nala nga mga programa an iginhahatag han goberno, partikular ni President Gloria Macapagal-Arroyo agud an pamilya Pilipino in dire gud igsakit an kabutangan.
Didi ha am ha Eastern Samar, tinuyuan na man gud la namon ngin dire pa kami hine maghingaupay.
Yana, an pinaka urhe nga mandu han Presidente, ine nga pagpa udngan anay han pagtuyangi han mga aplikante hin pagkonbirter han mga umhanon nga tuna; kay mayda pira man gud nga solar namon didi nga ginpanhimuan na hin kabablayan, hin bublangan ug bisan hin pribado ngan konkreto nga balay. Sering pa ngani hin usa nga opisyal han DAR, yana mayda pa tutolo nga kompanya in magbubutang hin mina ha Salcedo.
Ugaring, maupay gad daman pamatian kun may mina in usa nga lugar kay makakahatag ine hin trabaho ha paghagrani nga molopyo, pero, kun mamadako man daman hine an ihahatag nga distroso magmamakalolooy ada an mamadamo nga tawo labi na kami nga mga tuminongnong han lugar, kay pamati ko ine nga mga tag-ada hin nga hihimoon nga mga mina (kuno) in dire in mga taga didi ha Este.
Kun uuyunan la lugod han ngatanan, hin kaupay unta kun masusunod ine nga hingyap ni Pres. Arroyo nga madugngan an kutsisa ha uma, particular an humay kay asay man an numero uno nga pagkaon han pamilya Pilipino. Salit iya iginpapaudong an pang konbertir han kahagnaan basi matanman hin humay. (PIA-Eastern Samar) [top]
