Waray-Waray News: An P80 bilyun tikang sa VAT nahatag pondo para proyekto san mga pobre, sugad ni PGMA
Ni Nene A. Manzanares
Manila (20 July) -- Tikang sa Camp John Hay sa Baguio City, nangutana si Presidente Gloria Macapagal-Arroyo nga kun kuhaon an VAT tikang sa petrolyo ngan gasolina hain man kikitaon an maabot P80 bilyun nga ginagamit para san mga pobre?
Ginpangutana ine san Presidente durante san pormal nga pagtampo san Cordillera Administrative Region (CAR) ngan san Laka-Christian Democrats (CMD) ngan Kampi, an pinakadaku nga mga partido politikal sa nasud.
Sa pahayag san Presidente, kanya gin-aghat a kanya mga kapartido nga magkasarayu ngan buligan a kanya administrasyon san paningkamot sine nga magkayaun seguridad sa pagkaon ngan trabaho para san mga Filipino.
Ginsugad ni Presidente an mga lideres ngan mga miembro san Lakas-CMD nga natural la nga san paghingita san pinaka maupay nga solusyon san mga problema san nasud, magkakayaun sin mga magkadurudilain ng mga opinyon.
Gintagan bug-at san Presidente nga an VAT in naghatag kumpyansa san mga namumuhunan bisan pa an mga interest rate sulod sin 91 dias san treasury billsa in naghibubu tikang sa 7.7 ka porsiento ngadtu san 2.92 ka porsiento.
Mahihinumduman nga tikang P56.50 kada $1 dolyar nagkusog an piso ngadtu sin P40.20 kada dolyar ugsa nagraut an pankalibutan nga ekonomiya diin nagbalik pagluya an piso ngadtu sa P45 kada dolyar.
Naghuhunahuna an Presidente nga kun kukuhaon an VAT, posible ine makaluya san kumpyansa san mga namumuhuan sa nasud ngan magpalaksi san paghitaas san mga "interest" ngan "exchange rates" diin makakadugang ine san paghitaas san mga paraliton ngan makaka apekto san pankabug-usan nga ekonomiya san nasud.
Pinaagi sin pangutana nagsugad an Presidente nga an mga magyaman la an makakabenepisyo san pagkuha san VAT matungod nga nakunsumo sira sin 84 ka porsiento san gasolina, petrolyo, lana ngan nakunsumo gihapon sira sin 90 ka porsiento elektrisidad. Kun kukuhaon an VAT mawawaraan sin pilyunes ka pesos an mga pobre diin napopondohan na a mga proyekto para sa kanara matungod san VAT. (PIA-Northern Samar) [top]
