Waray-Waray News: Mga opisyales han Malacanang, pinapahinumdum han pag-iban han ginagamit nga awto, gasolina
By Alice Nicart
Manila (21 July) -- Ginpahinunduman an Malacanang an mga opisyales hine nga iban-ibanan an ira convoy nga mga sarakyan, ha pagsunod na ngahaw han kamanduan ni Pres. Gloria Macapagal-Arroyo nga ibanan hin 10% an ira nakukunsumo nga gasolina.
Panawagan daw ine ni Press Secretary Jesus Dureza, tungod han iya nabaruan nga mga report nga ha luyo han kamanduan han Presidente, mayda la gihap mga opisyales han Palasyo nga tag-hura la gihapon an mga nagsusurunod nga mga sarakyan kun ine hira in nagkakagawas.
Dugang pa daw ni Dureza kaangayan gud magsunod an kada usa ha ira ha Malacanang kay labot la nga kamanduan ine han Presidente, arungot na ine han publiko salit hin-o daw hira nga magmamamaurog? Labot pa, kun dire magsunod an kada usa ha ira, daw may barabtunon daw han Presidente, ngan nasukot padaman daw ine it Presidente kunkay-ano nga dire masusunod iton iya kamanduan.
Para daw ha iya, nagsering hi Dureza, nga lugaringon nga awto it iya ginagamit ngan napalit hiya hit iya lugaringon gasoline. (PIA-Eastern Samar) [top]
