Manila (22 July) -- Nagpahayag hi Press Secretary Jesus Dureza ha diri pala maiha nga obligasyon han mga kompaniya han lana nga ig-eksplikar ha gobyerno ngan ha publiko, ha pinulongan nga masayon maintindihan han komon nga katawhan, an basaranan para hin ano man nga umento ha presyo han lana. Ini en ha panuyo nga malikayan an kagupong ngan diri pagsinabtanay.

Dida hin usa nga press conference, nagsiring hi Dureza nga pareho han katawhan, interesado gihapon an Malacañang nga mahibaro han mga rason ha luyo hin kada pag-umento han presyo han lana tungod nga an gobyerno, partikular an administrasyon Arroyo, amo an ginbabasol ha kada panahon nga naumento an presyo han lana.

Nagsiring pa hiya nga an bisan ano nga pagbabag-o han presyo han lana hiton tidaraon en kinahanglan ha temprano pa ig-eksplikar han mga taga-industriya han lana ha pinulongan han masa, ngan diri pinaagi hin komplikado nga lingwahe han mga eksperto han mao nga industriya.

Mahihinumduman nga iginpasamwak ni Dureza han naglabay nga Domingo an desisyon han Filipinas Shell ngan Petron Corporation, duha han tulo nga pinakadagku nga mga kompaniya hin lana ha nasud, an pag-iban nira hin P1.50 kada litro han presyo han diesel ha pagbaton han paghangyo ni Pangulo Gloria Macapagal-Arroyo nga pahibub-an an presyo hini nga produkto.

Hadton naglabay nga Sabado, gin-paumentohan han Shell ngan Petron an presyo han diesel hin P3 kada litro. Pinaagi hini, nahimutang hin haros P59 kada litro an presyo han diesel, an pinakahitaas nga presyo nga nahimarka para han mao nga produkto ha lokal nga merkado.

Kondi, ginmando-an han Pangulo hira Executive Secretary Eduardo Ermita ngan Energy Secretary Angelo Reyes nga igpahamtang ngadto han mga opisyal han duha nga mga kompaniya hin lana an iya paghangyo para hin pagpahibubo han presyo nga nagresulta han mao nga P1.50 kada litro nga paghibubo han presyo han diesel.