Waray-Waray News: Padayon nga hinabang ngadto han 49,138 nga mga biktima ni 'Frank' ha rehiyon 12 iginpatapod ni PGMA
Manila (22 July) -- Ginamndo-an kakulop ni Pangulo Gloria Macapagal-Arroyo an mga ahensya han gobyerno nga igpadayon an mga pagtabang ngan padagmiton an rehabilitasyon agud mapagarugaan an kakuri-an hin maabot 49,138 nga mga pamilya ha rehiyon 12 nga grabe naapektaran han bagyo nga Frank han naglabay nga bulan.
Iginpagawas han Pangulo an iya direktiba samtang gindudumara niya an miting han Regional Disaster Coordinating Councils (RDCC) kakulop didto han Kalsangi Clubhouse han Dole Philippines ha Polomolok, South Cotabato.
Sigun kan Press Secretary Jesus Dureza, iginmando han Pangulo nga tutokan an rehabilitasyon ha mga lugar pan-agrikultura partikular ha Lambayon, Sultan Kudarat, an daku nga surok hin humay han rehiyon nga may-ada maabot 5 mil ka hektarya hin mga hagna.
Nagsiring hi Dureza nga usa nga task force an pagpopormahon kon diin magigin kaapi hini an Autonomous Region of Muslim Mindanao (ARMM) agud magkaada hin pag-urusa han mga rehabilitasyon ngada han mga apektado nga mga lugar ha Mindanao.
Pira han mga presente dida han mao nga okasyon amo an mga gobernador, congressmen, mayors ngan iba pa nga mga opisyal han rehiyon.
Presente gihapon durante han miting hira National Disaster Coordinating Council (NDCC) Chairman and Defense Secretary Gilbert Teodoro, Presidential Assistant for the Peace Process ret. General Hermogenes Esperon, Armed Forces Chief of Staff General Alexander Yano ngan Press Secretary Jesus Dureza.
Nagreport hi RDCC 12 chairman Chief Supt.Felizardo Serapio Jr. nga damo nga mga biktima han bagyo an nagpapabilin pa ha evacuation centers samtang nagpapadayon pa an pagbabaha dida hin pira nga mga lugar sugad han Cotabato City; Misayap, North Cotabato; Lambayon, Sultan Kudarat ngan pira pa nga lugar ha North Cotabato.
Sumala kan Serapio, iginmando han Pangulo nga paghawanon an mga water lilies, limpyohan an mga kanal ngan iba pa nga mga aragi-an hin tubig agud mapudngan an pagbabaha dida han rehiyon.
An kabug-osan nga danyos ngada han imprastraktura, agrikultura, mga hayopan ngan pribado nga propiedades en naabot hin 2.483 bilyones de pesos. Maabot 49,138 nga mga pamilya o kon 245,675 nga katawhan an apektado han bagyo.
Kataliwan han bagyo, pasige an Pangulo hin panhatag hin hinabang ngan pagdumara hin RDCC nga mga miting dida hin apektado nga mga probinsya agud masiguro nga maipahamtang an ginkikinahanglan nga mga serbisyo ngan ha sugad hini mapagarugaan an kakuri-an han mga biktima han bagyo. (PIA-Eastern Samar) [top]
