Waray-Waray News: NFA igsisiguro an panmalit hin 10M ka-sako hin humay
By Alice Nicart
Tacloban City (25 July) -- Nakatalaan manmalit hin por lo menus 10M ka sako nga tipasi o humay an National Food Authority (NFA) tikang han produkto han local nga mga parag-uma.
Nakapatik ine nga kamanduan dida han direktiba ni NFA Administrator Jess P. Navarro nga nagsasagda han mga hepe han NFA, ma ha probinsiya man o rehiyon nga makipagsumpayan ha ira tagsa tagsa nga mga pinuno han bungto agud ipasabot ine nga bag-o nga programa han buhatan nga makapalit hin damo nga humay.
Nagsering an report nga naglalaum daw ine hi Navarro nga damo nga parag-uma an maiinganyar magbalidya han ira mga humay tungod kay pina umentuhan han NFa an presyo han ira papaliton nga humay ha mga parag-uma. Idinugng pa han report nga naabot daw hin dise-7 an pagpalit han NFA basta an humay in maupay an ka humlad ug ka-palid.
Idinugang pa daw ni Navarro nga ira gin-iinganyar an mga parag-uma nga magbalidya han ira humay bas hira makabulig han programa han goberno nga makatirok por lo menus hin 10M ka sako nga humay tubtob katapusan han tuig 2008. Tikang daw yana nga Septembre, titinguhaon han NFA nga makakapalit kada bulan hin 2.5M ka sako. Naka andam na daw an pondo para ipanmalit hin humay ha kada probinsiya. Mayda daw daman mga tambulig ha mga parag-uma lakip na an mga trabahante nga mabulig han 288 nga mga estasyon han NFA nga namamalit hin humay. (PIA-Eastern Samar) [top]
