Waray-Waray News: Nagkita si PGMA ngan san bayani nga bata sa Antique
Ni Nene A. Manzanares
Catarman, Northern Samar (28 July) -- Nagkita kahapon sira Presinebte Gloria Macapagal Arroyo ngan san 13 anyos nga bata nga sinusugad nga bayani sa probinsya san Antique. Ine nga bata an nagsalbar sa kanya Nanay upod an duha niya nga mga kamanghuran nga dire malumos dida san kagus-gun san Bagyo Frank.
Nagbaktas an Presidente tikang sa Malakanyang ngadtu sa Premier Guest House diin nakadtu sin Rodney Berdin kaupod a kanya pamilya sa banda alas singko kahapon. Kanya ginlamano ngan gindayaw an bata sa kanya ginhimo ng pagsalbar sa kanya pamilya.
Kaupod ni Rodney a kanya 40 anyos nga Nanay nga si Maria ngan a kanya mga kabugtuan nga sira July, 7 anyos ngan an puto nga bugto nga si Tonna May, 3 anyos.
Gin-updan an pamiya Berdin ngadtu sa Malakanyang ni Josephine Daguy-luan, an municipal social welfare officer san Belison nga bungto san Antique ngan si Rosario Cabrera, namumuno san Office of Civil Defense san Iloilo.
Nakadtu gihapon si Press Secretary Jesus Dureza Jesus G. Dureza ngan Presidential Spokesperson Anthony Golez nga preheo nakgi-istorya sa bata ngan sa kanya pamilya gamit a kanra yinaknan agud makag-istorya an bata sa kanya eksperyensa san natabu nga paglibre sa kanya pamilya.
Nahibaruan nga si Rodyney in nagbaya na sa eskwela agud buligan a kanya Nanay nga sayu nga mangongopra.
Samtang an bug-os nga pamilya in nakadtu sa kanra payag sa Barangay Rumbang sa may Sibalong River gin-anod a kanra payag san naghitaas nga tubig baha kaupod an mga naestar siton nga payag sa banda alas siete sa aga.
Si Rodney nga maupay nga nalangoy in gin libre a kanya siete anyos nga bugto nga si July ngan kanya ine ginpakapot sin sayu nga Camachile nga puno. Natad-an ine nga bata sa kanya uncle nga ginabuligan siya. Duguan an bata san mga tunok tikang sa Camachile nga puno.
Iya naman ginlangoy a kanya Nanay ngan bugto nga babaye nga gin-anod san naghitaas nga tubig baha. Si Rodney in nahimo nga tag salbar sa kanya Nanay ngan kan Tonna Mae. Naglutao sira sulod sin lima ka oras tubtub yaun nira naimdan nga kahoy nga naaanod diin kanra ine ginkapyutan.
Tulo pa ka oras a kanra pagkaput san nasabi nga kahoy ugsa sira naanod ngadtu sa banda pampang nga mao na an kanra paka haw-as ngadtu sa kalibrehan..! (PIA, Northern Samar) [top]
