Presidential Communications Operations Office



  PIA Bldg, Visayas Ave, Diliman, Quezon City, Philippines
  Friday, 25 May 2018 News Before 1 Feb 2012. Click for Latest
Web PIA  
 
home
 
about
 
fotos
 
info
 
links
 
ncrr01carr02r03calmimr05r06r07r08r09r10r11r12r13
 << May 2018 >> 
S M T W T F S
1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31
Special News Editions:
English.Tagalog.Cebuano
Ilocano.Waray.Hiligaynon
Pangasinan.Other
PIA Specials:
NEW! Cabinet Officials
Jobs.Slides.Specials.Ads. Events.ASEAN.Multimedia
Visitors since 15 Feb 2011:
PIA News Archive:
English.Tagalog.Cebuano
Waray.Hiligaynon.Ilocano
Pangasinan.All
PIA Archive News Reader

PIA Press Release
2008/10/15

Waray-Waray News: Parte na san istorya san Silvino Lubos an siyahan nga pagbisita sin Presidente san Pilipinas

Ni Nene A. Manzanares

Silvino Lubos, Northern Samar (15 October) -- Pareho sin patron. Mao ine an masusugad san mga pangandaman nga ginhimo ugsa san pag-abot san Presidente san Pilipinas sa bungto san Silvino Lubos.


Mga Pangandaman

Duha ka adlaw ugsa an mahingudanon nga petsa san Septiembre 29, naobserbahan na an mga pangandaman nga ginhimo san mga Silvinonhon. Sa Silvino Lubos Central School, damo nga mga kabataan an naimdan nga adto sa kanra mga classrooms nga purupareho sin yaun sira klase. Kaistorya nira a kanra mga maestra ngan mga maestro ngan kihanglan nira memoryahon an mga pulong- panhumalatag san pinkaimportante nga bisita sa kanra bungto.

An iba nga mga maestro ngan mga maestra, kaupod in pipira nga mga kag-anak ngan mga empleyado san munisipyo in nagbuburublig pag instalar sin mga tarpaulins nga nagsasaludar san maabot nga mga bisita. An iba, nagpipintar san mga bungbung san eskwelahan, an iba naman naglilimpyo dire la sa eskwelahan kundi pati sa kanra mga bungsaran.

Samtang, sakay sin mga helicopter, nagka-abot an mga advance parties tikang sa Malakanyang. Ginkomponer ine san Presidential Security Group, Presidential Management Staff, Media Accreditation Relations Office, mga cameramen san Office of the President. Nag-kaabot gihapon an mga taga kapitolyo sa pamuno san Provincial Social Welfare and Development office ngan ahensya nasyonal tikang sa Catarman pareho san Department of Education, Department of Public works and Highways, ngan san Philippine Information Agency. Umabot gihapon an mga taga Radyo ng Bayan-DYOG san Calbayog City.

An seguridad san lugar in ginburubligan san pwersa san Philippine National Police, kaupod an 803rd Brigade ngan 63rd Infantry Battalion san Opong, sa bungto san Catubig.

Ine ngatanan nga mga pangandaman mao in ginpamunuan san Tatay san bungto san Silvino Lubos nga si Mayor Edmund S. Gillamac kaupod a kanya kasagabay sa kinabuhi nga si Board Member Marites Jarito-Gillamac san segundo distrito san probinsya.

Sa pag-abot san pinamumulat nga Lunes nga adlaw, petsa 29 san Septiembre, aga pa nga nagkamata an mga Silvinonhon. An maabot 300 nga mga kabataan nga Grade I pupils kaupod a kanra mga kag-anak in nakapwesto na sa eskwelahan diin iglalansar an National Supplemental Feeding Program san Presidente.

An entablado diin ginpamutang na an mga ig-haratag nga 1,500 family food packs ngan 1,600 packs nga school supplies in nakaandam na gihapon pati na an mga dagku nga tarpaulins pareho sin naghuhulat na san mga bisita.


An Pag-abot ni Presidente Gloria Macapagal Arroyo

Ala una sa kulop, katapos gudla panginudto san mga Silvinonhon ngan mga nauna nga bisita san bungto, umabot an Presidential chopper diin nakasakay si Presidente Gloria Macapagal Arroyo kaupod an Presidential Party. Humugdon an chopper sa banda san high school nga sapit gudla san Silvino Lubos Central School.

Dire pa nakakalusad an Presidente, gintapo na siya sin dayupak ngan mga dagku nga boses nga nagtatawag sa kanya ngaran. Ginbaton ine san Presidente sin paghiyum ngan pagwagayway sa kanya tuo nga kamot. Paglusad san Presidente, nagdurudamu an pagdayupak ngan pagtawag sa kanya ngaran. Gintagan siya san tradisyonal nga saludo tikang kan Col. Eduaro del Rosario, brigade commander san 803rd brigade. Gisundan sine san paghatag san lei tikang kan Board Member Marites gillamac dungan san pagsugad san Presidente nga, "andito na ako!" (Mahihinumduman nga Mayor pala si Marites Gillamac, gin-imbitar na niya an Presidente nga bumisita sa Silvino Lubos dida sa kanra pagkita sin sayu nga okasyon sa Tacloban City.

Ginkarawat si Presidente Arroyo san bungto san Silvino Lubos pinaagi sin mapaso nga lamano tikang kan Mayor Edmund S. Gillamac, Vice-Mayor Leticia Abueza, Dr. Thelma Quitalig san DepEd. ngan iba pa nga mga opisyales lokal san nasabi nga departamento.

Gintapo gihapon si Presidente Arroyo ni Rev. Fr. Cecil Lucero an tagrepresentar ni Bishop Emmanuel Trance san Diocese of Catarman.

Kaupod ni Presidente Arroyo sa kanya Presidential Party sira DepEd Secretary Jesli Lapus, DPWH Usec. Rafael Yabut, Governor Raul Daza, Second District Congressman Emil Ong, Sec. Victor Domingo ngan iba pa nga mga opisyales san Region 8.


Groundbreaking para sin school building

Deretso nagpakadtu an Presidente sa banda san elementary school diin naghimo sin groundbreaking ceremony sa paghimo sin duha ka-classroom nga building nga magtatag-balay sin maabot 150 ngadtu 200 nga primary school pupils.


Paglansar san National Supplemental Feeding Program

Pagkatapos san groundbreaking, naglakaw sin mga 60 meters an President kaupod an mga opisyales sa pamuno ni Mayor Gillamac ngadtu san elementary school building diin ginlansar an National Supplemental Feeding Program. Personal nga ginserbihan san Presidente an mga Grade I pupils nga napili magpartisipar san feeding program.


Mga pahayag san Presidente

Sa gawas san nasabi nga building, naghatag an Presidente sin haliput nga pagbagaw. Nagpahayag siya sin pasalamat san paghatag san Silvino Lubos sin suporta sa kanya san naglabay nga eleksyon diin mayoriya san mga senador san administrasyon in gintagan sin suporta san mga botante. Gintagan sagdun san Presidente an mga nakadto namamati kanya san kaimportante san pagkaon san mga bata nga naeskwela. Nagpahayag siya nga an implementasyon san supplemental feeding pagbubuhaton sa bug-os nga probinsya sa Norte san Samar. Sa pankatapusan, nagpasalamat gihapon si Presidente Arroyo san mga Silvinonhon san daku nga onor nga ginhatag kanya bilang siyahan nga Presidente san Pilipinas nga nakatamak san tuna san bungto San Silvino Lubos.


Paghimo ngan pagtapos san sigad para sa Silvino Lubos

Dida na san pagbalik ni Presidente Arroyo sa landing site san Presidential chopper agud makakadtu na siya san sunod nga bungto nga kanya bibisitahon nga mao an Lope de Vega, padayun a kanya pakig-istorya san mga opisyales lokal sa pamuno ni Mayor Gillamac, diin ginhingadayan an nabibilin pa nga maabot 8 ka kilometro nga dapat pag-upayon nga sigad agud makonektar na an Silvino Lubos ngadtu sa national highway san probinsya.

Sa kaburubutngaan san eskwelahan, tumuko an paglakaw san grupo nira Presidente. Nahibaruan nala an maupay nga natabo san nagdayupak san mga tawo dida san magdesisyon an Presidente nga imbes nga konkreto nga sigad an himuon an sinusugad nga all weather road an pagbubuhaton upod in tulo nga baily bridge.


An paglarga san Presidente

Ala una kwarenta y cinco, lumupad na an Presidential chopper para san bungto san Lope de Vega. Pareho sa kanya pag-abot gintagan ni Presidente Arroyo sin hiyum an mga Silvinonhon dugang san pagwagayway sa kanya tuo nga kamot tigaman sa kanya pagsarit paglarga tikang san bungto nga siyahan pala nga nakaimud sin Presidente san Pilipinas.

Sa paglarga san Presidente, mapabilin san hunahuna san Silvinonhon nga dire imposible nga sa kanra kabutang sa butnga san higtaas nga kabukiran san Norte san Samar, maghahatag panahon in sayu nga Presidente san Pilipinas nga bisitahon an bungto. Sine nga pagbisita san pinakahitaas nga opisyal san nasud naglalaum dire la an Silvinohon kundi an mga Nortehanon nga mag-aabre ine sin mga oportunided panekonomiya san bungto san Silvino Lubos. (PIA-Northern Samar) [top]

|«  prev  next  »|
DAILY NEWS LIST:
»DOLE-OWWA Microsoft "Tulay" is intended for OFWs' immediate family
»Garantisadong Pambata services offered this week
»San Isidro of Davao Norte to get organic certification
»Davao architects optimistic of boom in real property industry
»DOLE-OSHC honors Hedcor with GKK Institutional Award
»Foreign missionaries put premium on education in Davao
»DTI-11 launches OTOP showcase
»Private sector called to hire differently-able persons
»Career Executive Service Officers gab opens
»BIR holds tax update seminar in Davao
|«  prev  next  »|

Philippine Official Gazette | Office of the President | Presidential Communications Operations Office
For comments and feedback, please email PIA Newsdesk
Copyright © 2005 Philippine Information Agency
PIA Building, Visayas Avenue, Diliman, Quezon City 1101 Philippines