Manila (2 July) -- Pinanhimuwa han Malacanang dida han Martes nga adlaw an mga aligasyon nga hi Pangulo Gloria Macapagal-Arroyo en nagside-trip ha Barbados dida han iya pagkadto ha Brazil han nakalabay nga semana.

Gintawag ni Press Secretary Serge Remonde nga dagko nga mga buwaon ini nga mga nagpasarang nga an Chief Executive ngan han iya delegasyon en nagside-trip ha Barbados ngan may kalabutan hin paghatag hin kuntrata hin usa nga kumpaniya nga nakabasi ha Barbados, nga amo an Smartmatic, para amo an kumapot han automation han 2010 nga pinili-ay.

"Waray sugad hini nga panhitabo nga side-trip ha Barbados. Kun hin-o man ini nga nagpapasarang hini nga mga hurob-hurob en dagko nga mga buwaon," sering ni Remonde.

Sering han Press Secretary nga an Pangulo upod an iya delegasyon en medyo lumiko anay ha Cartagena, Columbia han ira pagtipakadto ha Brazil para hin usa nga technical stop.

Sering niya nga an Pangulo en ginkumbida hin usa nga Pilipino nga negosyante nga hi Jime Augusto Zobel de Ayala, nga an asawa nga hi Misha en residente ha Columbia mentras an eroplano han Pangulo en nakahugdon dida han lugar.

Sering ni Remonde nga an Cartagena en ada ha kaburo-butngaan tikang ha Los Angeles tipakadto ha Brazil.

Dida han turotemprano, nagsering an Pangulo han United Opposition nga amo gihapon an Alkalde han Makati nga hi Jejomar Binay nga an side-trip en nagkaada hin damo nga mga spekulasyon, upod na dinhi an nagsasarang nga estorya nga may posibilidad nga an pagbisita ha Cartagena en may kalabutan hin posible nga business transaction ha Panama, nga ginkukunsiderar nga Switzerland hit Latin America.

Dugang pa ni Binay nga ini nga mga espekulasyon en nasuritan mahitungod han gin-aaligar nga kakulang hin pagklaro ngan nanhisumat nga pag-eebitar hit Malacanang hit isyu.

Pero, nagsering hi Remonde nga an Palasyo en pirmi nagpapasamwak hit mga biyahe han Pangulo ha langyaw, ngan dugang pa niya nga sige an iya pagpinasamwak parti ha side-trip ha Columbia tikang pa dida han una nga semana.

Nagsering gihapon an Press Secretary nga kaparti han black propaganda amo an gin-aaligar nga sige an pagside-trip han Pangulo ha iya mga biyahe ha langyaw para mamiling hin nasud nga waray extradition treaty para didto hiya pumahuway kun hiya lumusad na dida hit 2010.