Manila (16 July) -- Iginpatapod ni Presidente Gloria Macapagal-Arroyo an kanan Asia ka komitido pagpabaskug han regional ngan global cooperation ha ilarum han mga prinsipyo ngan panuyu-anan han Non-Aligned Movement (NAM) aber mabaton an mga problema han political, economic ngan social issues nga naatubang ha kalibutan.

Ha iya panmulong ha ngaran han Asian leaders ha opening ceremonies han ika 15 nga NAM Summit kakulop nga adlaw (Manila time) ha Maritim Congress Center ha Sharm El-Sheikh, ginsabi ni PGMA nga kinahanglan pabaskugon an international cooperation aber makabaton ini hagilayon han mga kinahanglanon sama han global financial crisis, nuclear-nonproliferation, climate change, pagpanalipod han mga migrant workers, ngan sugad man an interfaith ngan cultural understanding.

Ha sakob han singkwenta anyos, an NAM in nagpabilin han ka respetado nga istruktura ha pakikipagsumapayan han mga developing countries, segun kan PGMA.

Dugang pa niya, mahihimo la an international solidarity ha mga bubuhaton nga mga huruhimangraw, harampang ngan erestorya nga ha ka-urhian in mas mahatag hin pag gi-iru intindi, pagrespeto ngan pagkarawat han mga kina iya han igkasi tawo, sibilisasyon ngan pagtuo han Ginoo.

Gintagan niya hin duon an usa la nga boses han pagkaurusa nga magiging mabakod, marig-on ngan makakahatag hin kadagmitan nga solusyon han mga ayat nga gin aatubang han kalibutan.