Waray-Waray News: PGMA ginpasalamatan an NAM pag-indorso han RP para mangulo han Nuclear Review Confab
Manila (16 July) -- Ginpasalamatan ni Pangulo Gloria Macapagal-Arroyo an mga meyembro han Non-Aligned Movement (NAM) kakulop nga adlaw ha pag-indorso han Pilipinas para mangulo han Conference of States party ngadto han Nuclear Non-Proliferation Treaty (NPT) nga nakatalaan ha bulan han Mayo ha sunod nga tuig didto ha New York.
Dida han iya pagyakan ha ngaran han mga lideres han Asia dida han pagtikang han 15th NAM Summit kakulop han kulop (Manila time) ha Maritim Congress Center ha Sharm El-Sheikh, nagsering an Pangulo nga mabulig an Asia pagpakurokusog han kuoperasyon pagbaton han mga kanan politika, ekonomiya ngan iba pa nga mga isyu nga nakakaapekto han kanan kalibutan kahimyangan upod na an tuhay nga pag-gamit han nuclear nga enerhiya.
"Gusto ko gamiton ini nga oportunidad Mr. President para pasalamatan an mga meyembro han NAM pag-indorso han Pilipinas para mangulo han 2010 review conference of the Non-Proliferation Treaty, nga ginhinabi han UN Sec. General Ban Ki Moon dida han iya pangasoy ha turotemprano pa yana nga adlwaw," sering niya.
Han nakalabay nga Mayo, an kumitiba nga nagpripreparar para han United Nations-backed Conference han States parties ngadto han Nuclear Non-Proliferation Treaty in nag-arabuyon kan Libran Cabactulan, Ambassador han Pilipinas ngadto ha United Arab Emirates, nga magin pangulo para han kanan Mayo 2010 nga kumperensiya ha New York.
Hi Ambassador Boniface Chidyausiku han Zimbabwe, chairman han kanan preparatory committee ika-tulo nga sesyon nga gindumara ha New York han nakalabay nga Mayo 4-15, en nagsering nga an hul-os nga pagkaarabuyon parti han ginkauro-estoryahan en maupay nga senyales para han kanan sunod nga tuig pagrepaso han kanan 1970 nga ginkasarabutan.
An sentro han uroestorya dida han 2010 nga kumperensya amo an parti han three pillars han treaty nga amo an disarmament, non-proliferation, ngan han mahimyang nga pag-gamit han kanan nuclear nga enerhiya, upod an hurohimangraw parti han nuclear-free nga mga sona.
An NPT in ginrerepaso kada lima katuig.
Ha 190 nga mga meyembro nga natikang ha iba-iba nga nasud, an pagrepaso in nakikitan nga duro in kamalinampuson.
"Salid nagdadahum ako nga ngatanan nga mga nasud nga meyembro han Nan-Aligned Movement, kun diin ginpili an Pilipinas nga mangulo hini nga pagrepaso nga kunperensya, in sumopurta hini nga aktibidad ngan himuon ini nga magin malinampuson," sering han Pangulo. (PIA-8/maa) [top]
