Waray-Waray News: Matutok ha Interfaith Dialogue an miting han NAM ha Manila
Manila (16 July) -- Tututokan daw ha parte han kamurayawan an bubuhaton nga espesyal nga miting han Non-Aligned Movement (NAM) Ministerial Meeting on Interfaith Dialogue and Cooperation for Peace ug linalauman ine nga makakaparig-on pa han mga gios nga magkaada na kamurayawan ug kaursahan.
Amo daw ine an sering ni President Gloria Macapagal-Arroyo nga hiton tikarapos daw it tuig bubuhaton ha nasud ine nga espesyal nga NAM summit.
Ha iya pamulong para han mga lideres han Asya durante han ika-15 nga summit han NAM, didto ha Maritim Congress Center ha Sharm El-Sheikh, nagsiring an Presidente nga matambulig an rehiyon han Asya pinaagi han panagbalayi han espesyal nga Non-Aligned Movement Ministerial Meeting on Interfaith Dialogue and Cooperation for Peace nga bubuhaton daw yana nga Desyembre 1-3.
Sumala han Presidente, an bubuhaton nga miting hiton Desyembre in magtitigaman han primero pala nga Non-Aligned Movement (NAM) ha Pilipinas labot nga magpapakaupay pa ine han mga posibilidad hin iristorya pangkamurayawan ug pagpauswag han katilingban.
Gintagan doon han Presidente nga an mga problema ha panalapi, pagbabag-o han klima bisan pa an mga tarhug hin panhimo hin mga armas nuclear in paghihingadayan ngan matatagan hin solusyon pinaaagi han pagkaurusa ug iristorya han mga mga nasud ha Asya nga dapit lakip na an iba-iba nga grupo han sosyedad ug relihiyon.
An miting pa daw in makakahatag hin oportunidad han mga representantes han 118 nga mga nasud agud ira masabtan an papel han interfaith dialogue ug pagkaurusa ha pagmala-kaundanga han sarusaramok nga nagdudurot hin damyos ha kinabuhi ug propedad ha damo nga mga nasud han kalibutan. (PIA-Eastern Samar) [top]
