Waray-Waray News: EO bahin han katubtoban nga presyo han medisina magigin epektibo hiton Agosto 15
Manila (23 July) -- Pinamatud-an ni Executive Secretary Eduardo Ermita kakulop nga usa nga executive order para han pag-obligar hin katubtoban nga presyo ngada hin pira nga kinahanglanon nga mga medisina en bangin mapirmahan ni Pangulo Gloria Macapagal-Arroyo ugsa hiya gumikan ngadto ha Estados Unidos hiton Hulyo 30.
An EO, sering niya, en magigin epektibo hiton Agosto 15. Nagsering hi Ermita nga an report tikang han Department of Health amo an magigin basaranan han proposisyon nga executive order nga ira igsusumiter kan Pangulo Arroyo agud maipatuman an panuyo han Cheap Medicines Act.
Kasumpay hini, iginpatapod ni Ermita nga hihimo-on han Pangulo an kaangayan nga pitad para han kapulsanan han kadam-an nga katawhan. Dida hin usa nga surat nga ginsumiter ngadto han buhatan han Pangulo, ginpahayag han Department of Health (DOH) nga ginkahuromanan na nira an pagrepaso ngan kumpirmasyon han letter of undertaking han Pharmaceutical Healthcare Association of the Philippines (PHAP) kon diin ginpahibub-an hin 50 porsyento an mga presyo hin 16 nga mga medisina samtang lima en non-compliant.
An 16 nga mga medisina nga nagtuman hin pagpapahibubo han presyo hin 50 porsyento, amo adton mga tutomaron ha pagtambal hin alta presyon, diabetes, komon nga mga impeksyon, amoebiasis ngan adton para hin kanser sugad han leukemia. An lima nga mga medisina nga waray magsugot hin boluntaryo nga pag-iban hin 50 porsyento han presyo en igrerekomendar para han pag-obligar hin maximum drug retail price pinaagi hin executive order nga pipirmahan han Pangulo.
Kondi, igindugang han mga kompaniya hin medisina en 31 nga mga produkto kon diin iibanan nira an presyo hini tikang hin 10 ngadto hin 50 porsyento. Ini nga mga medisina en para ha pagtambal hin goiter, alta presyon, hitaas nga lebel hin cholesterol, arthritis, fungal infections, diabetes, labot hin iba pa. Han naglabay nga tuig, ginpirmahan han Pangulo an RA 9502 o an Universally Accessible, Cheaper and Quality Medicines Act of 2008. Ha ilarum hini nga balaud, bisan hin-o nga tawo o kon organisasyon en makakahangyo ha Bureau of Food and Drugs nga makag-import hin mga medisina ngan igbaligya ini ha publiko ha rasonable nga presyo. (PIA-Eastern Samar) [top]
