Ni Nene A. Manzanares

Manila (23 July) -- An Department of Foreign Affairs (DFA) ngan san Bise Presidente nga bilang presidential adviser on Overseas Filipino workers (OFWs) Noli De Castro in nag-aaghat otro san mga Filipino nga karuyag magtrabaho sa langyaw nga mga nasud nga angay nira paglikyan in mga nasud nga yaun deployment ban pareho san Iran ngan Afghanistan.

Ine nga otro nga pag-aghat in ginhimo pagkatapos sin 10 nga mga Filipino sa 16 nga mga sakay sin sayu nga helicopter nga nag crash sa Kandahar, Afghanistan in nasabutan nga nagkamatay.

Sin sayu nga interview sa radio, ginpanawagan ni VP De Castro an mga Filipino nga unta mamati ngan adtu karuyag mamiling trabaho sa iba nga mga nasud nga dire na ungayan an Afghanistan.

Nageksplikar si De Castro nga an pinakadaku nga rason nga an Department of Foreign Affairs in nag iimplementar san deployment ban mao nga nadire sira nga mabutang si peligro an mga OFWs.

Dugang pa nga sugad ni De Castro nga sayu nga hinungdan kay nano nga karuyag san mga Filipino ditto sa Afghanistan mao an daku nga sweldo. Sugad pa niya nga an karpentero didto in yaun sweldo nga 1,300 ka dolyar. Ngan damo talaga an trabaho didto matungod nga yaun ginhihimo nga duha nga mga base militar.

Ginpatapud ni Bise Presidente De Castro an publiko nga yaun bulig nga ginhahatag ngadtu sa 10 nga mga OFWs nga nakasakay san nasabi nga helicopter nga nag crash. Dugang nga sugad ni De Castro nga angay buligan an mga biktima, legal man o illegal matungod nga mga Filipino man ine. Paglalanaton gihapon a kanra mga nag empleyo agud matagan sira sa kanra mga benepisyo.