Waray-Waray News: SONA ni PGMA nagkaada magdirodilain nga mga reaksyon
Manila (29 July) -- Maisogon kondi pino.
Amo ini an paghulagway nira Senador Miriam Defensor Santiago ngan Metro Manila Development Authority Chairman Bayani Fernando han State of the Nation Address (SONA) ni Pangulo Gloria Macapagal-Arroyo kakulop dida han gintampo nga sesyon han Kongreso ha Batasang Pambansa.
Maisog daw, kondi iginpamulong ha pino nga paagi, sering ni Fernando ha paghiunabi han baton ni Pangulo Arroyo ngada han iya mga kritiko mahiunong hin maglainlain nga mga isyu.
Inabuyon naman hi Senador Santiago han obserbasyon ni Fernando ha pagsering nga karuyag niya lamanohon an Pangulo tungod han mag-upay nga pagkapili hin mga polong nga iginpamulong ha pino pa nga paagi.
Para naman kan Cavite 2nd District Representative Elpidio "Pidi" Barzaga, kon mahiunong hiton pagmaneho han ekonomiya an paghihiruhimangrawan, nanngunguna hi Pangulo Arrroyo dida hiton iya lista.
Ha marka nga 1 ngada hin 10, nuebe an iya paggrado han Pangulo. Segurado hi Barzaga nga bisan an mga kritiko han administrasyon Arroyo en maabuyon nga hi Pangulo Arroyo an pinakamaupay han ngatanan nga mga nagin Presidente han Pilipinas kon mahiunong han pagmaneho han ekonomiya an paghihisgutan.
Gintagan hin duon ni Barzaga nga bisan kon naapektaran an nasud han pankalibutan nga pagluya han ekonomiya, na-imanyubra han Pangulo an ekonomiya agud malikayan an mga kakuri-an.
Nagsering pa hiya nga napudngan han Pangulo an paghitaas han presyo han mga parapliton ha nasud ha butnga hin pankalibutan nga krisis pinansyal, ngan ini sering niya amo an iya pinakadako nga nahimo.
Abuyon naman hini hi Manila 5th District Representative Amado Bagatsing nga nagsering nga iginpakita han Pangulo nga mayda niya panlantaw. Sigun kan Bagatsing, daw sugad hin ginpatumar kita han Pangulo hin mapait nga tableta agud makailob kita pag-atubang hin magkuri nga mga panahon. (PIA-Eastern Samar) [top]
