Waray-Waray News: Pangampanya basar hiton imo kalugaringon kusog, panawagan han Malacañang ha mga naglalarang pagkandidato pagkapangulo
Manila (31 July) -- Nanawagan an Malacañang ha mga naglalarang pagkandidato ka Presidente hiton panpangulohan ngan nasyunal nga pinili-ay sunod nga tuig nga ighurma an ira tagsa-tagsa nga mga kampanya basar hiton ira mga kusog ngan kon ano an ira plano nga pagbubuhaton para han nasud imbes nga magpasikat ngan ungkaton en daan na nga mga isyu mahiunong han Pangulo.
Dida han press briefing ha Malacañang kakulop, nagsering hi Cabinet Secretary Silvestre Bello III nga an mga 'Presidentiables' nga nagpapadayon pagbuhat hin sugad hini nga klase hin panmomolitika en diri angay magin lider han nasud.
Gin-awhag ni Bello an mga tikandidato ka Presidente nga mangampanya sarig han ira kalugaringon kusog imbes nga sakyan an kaluyahan han pangontra ha politika.
Gintagan niya hin duon nga adton nag-aambisyon ka Presidente nga nangangampanya pinaagi hin pagda-ot hin igkasi-tawo en mayda han sinisering nga crab mentality syndrome.
Crab presidentiables daw an tawag hadton mayda sugad nga pamatasan, sering ni Bello.
Pahimatngon ni Bello – diri angay botosan an sugad nga mga kandidato. Peligroso daw an pagkaada hin mga lider nga nadepender hiton kaluyahan han iba ngan karuyag makaabot ha pungkay pinaagi hin pagtamaki han ira igkasi-tawo, dugang pa nga pahayag ni Bello. (PIA-Eastern Samar) [top]
