Copenhagen (PNA) (16 December) -- Hi Pangulo Gloria Macapagal-Arroyo in magyayakan buwas hit kulop (2 p.m. Denmark time, 9:00 p.m. Manila time) ha plenary session han climate change summit, nga gindudumara ha Bella Center dinhi hini nga Danish capital.

Dida hini nga gutiay nga oras nga ginhatag ha iya, ginhuhuna-hunaan nga maipapahamtang ni Mrs. Arroyo an iya kaso para han climate change mitigation and adaptation.

An United Nations Framework of Convention for Climate Change, nga sponsor han kumperensya, in nag-obligar kan Mrs. Arroyo paghatag ngadto han secretariat hin kopya han iya speech para permanente nga record. An pinaka-importante hini, an mga rekomendasyon nga iginplastar in igkukunsiderar kun an draft treaty in napreparar na han technical working committee ngan nagin sentro na han debati han mga top-level nga mga delegado.

An Conference of the Parties (COP) "an nagrereview han national communications ngan emission han mga imbintaryo nga ginsumite han mga nasud ngan an mga epekto han mga pitad nga ira ginbuhat para matapo an panuyo han kumbensyon."

Gintawag nga kanan UNFCCC supreme body, an COP in nakumponi han ngatanan nga mga nasud nga kaparti han kumbensyon.

Kun maaprobaran, an ginkasarabutan in maliwan han Kyoto Protocol, kun diin pananawagan an 37 nga mga naghinga-upay na nga mga nasud, nga gintawag nga Annex I Countries pagpauro-ubos hin 5.2 porsyento han ira produksyon han greenhouse gas emissions, notably carbon dioxide, methane, nitrous oxide, kun diin gagamiton an 1990 nga level bali benchmark.

Ha iba-iba nga mga katitirok, nanawagan hi Mrs. Arroyo para hin maski na manla 30 porsyento nga pag-iban han greenhouse gas emissions ha ubos han 1990 nga level para han masunod nga pito ka-tuig. Nag-apila gihapon hiya ngadto han mga industrialized countries nga mag-establisar hin duha ka porsyento nga global tax o levy ha kada ton hin carbon dioxide nga magawas ngadto ha kalarakan.

Sesenta porsyento han kantidad in mahingangadto han nasud nga nagsunog han fossil fuel, nga amo an nagigin kawsa han mga emisyon. An mahibibilin in mahingangadto ha Multilateral Adaptation Fund.

Basi ha mga pagkarkulo, $34 bilyones in marereyalisar ha usa ka-tuig, an kantidad nga pwede magamit para han rehabilitasyon han mga nasud nga apektado han global warming phenomenon.

An Kyoto Protocol in waray makatapo han mga gindadahum han mga delegado. Maski an Estados Unidos, an US Senate in bumaribad pag-aprobar hini.