Baguio City (29 December) -- Nakakapahimulos an turismo nga sektor hini nga syudad han holiday economics ni Pangulo Gloria Macapagal-Arroyo.

Nagsering hi Baguio Country Club Generl Manager Anthony de Leon, nga amo gihapon an presidente han Hotel and Restaurant Association of Baguio (HRAB), nga nakakabawi na an turismo nga sektor han Baguio City kataliwan ma-igo ini ngan han iba pa han Cordillera Administrative Region (CAR) han bagyo "Pepeng."

Mapinasalamaton hi de Leon nga damo an nabisita ha Baguio kon diin kadak-an hini en lokal nga mga turista.

Nagpahayag hiya nga an presensya han Pangulo dida hini nga syudad en nakakaamot nga magmadarudamo an mga manmarasyada durante han kapaskohan ngan han semana santa. Gintagan niya hin duon nga pirme gud ginsusuportaran han Pangulo an industriya han turismo diri la ha Baguio kondi ha palibot han nasud.

Pinaagi han holiday economics han Pangulo, nagkaada hin damo nga mga oportunidad, sering niya.

Nabatasan na han Pangulo an pagpalipas han kapaskohan ha Baguio kon diin reserbado o okupado an mga hotel dida hini nga panahon.

Gintikangan igpatuman han Pangulo an ideya han holiday economics hadton 2001 agud magmabakod an nagtitikaluya nga ekonomiya ngan nagin regular ini nga prayoridad han iya administrasyon tungod nga nakita niya nga dako an mahi-aamot han turismo pagpa-uswag han ekonomiya.

Kasagaran nga nagpapagawas an Pangulo hin mga proklamasyon pag-ugsod han piesta opisyal ngadto hiton adlaw nga Biyernes kon nahitutuman an petsa han piesta opisyal hiton Miyerkules o kon Huwebes. Gin-uugsod naman ngadto ha Martes kon an petsa han piesta opisyal en nahitutuman nga Lunes. Panuyo la hini nga pitad nga makapahimulos hin tulo-ka-adlaw nga bakasyon an mga empleyado ha gobyerno ngan sugad man han ha pribado.