Waray-Waray News: Kamando-an bahin han co-terminous nga mga opisyal ngan mga empleyado, ginklaro ni Lacierda
Manila (2 July) -- Iginpagawas kakulop ni Presidential spokesman Edwin F. Lacierda an gintuhay nga bersyon han Memorandum Circular No. 1 nga nagpatin-aw pa han isyu mahiunong hin mga opisyal ha gobyerno ngan hin kontraktuwal nga mga empleyado kanay panenerbihan en nagtapos hadton Hunyo 30 kadungan han pagtatapos han administrasyon Arroyo.
Sigun kan Lacierda, labot la han pagkakaiba ha pamulong, an gintuhay nga bersyon en pareho daw la an unod ngan ranog sugad han nahiuna nga bersyon han Sirkular nga ginpirmahan hadton Hunyo 30 han bag-o nga Executive Secretary nga hi Paquito N. Ochoa, Jr.
Waray pagkasumpaki an duha nga sirkular kay pareho la an ira unod, sering ni Lacierda nga gilayon ginpantagan an mga kaapi han media hin kopya han bag-o nga MC No. 1 nga ginpirmahan ngan iginpagawas ni Ochoa ha amo ngahaw nga adlaw.
Nagdumara hi Lacierda hin news briefing agud paghimayon an unod ngan katuyoanan han usa han mga pinakabag-o nga opisyal nga pasamwak han Malacaņang.
Gintagan niya hin duon an basihanan han kamando-an sugad man ginpatin-aw nga an usa ka bulan nga palugit nga iginhahatag ngadto han mga empleyado han departamento ehekutibo nga an panenerbihan en co-terminous han administrasyon Arroyo en dara han kakinahanglanon han serbisyo ngan agud diri mabalaong o mautod an mga buruhaton ha gobyerno, mga opisyal nga proseso ngan mga transaksyon, ngan sugad man han pagpapahamtang hin serbisyo ngadto ha katawhan.
Igindeklarar han Sirkular nga bakante tinikangan han Hunyo 30, 2010 an ngatanan nga third level nga mga posisyon nga gin-ookuparan hin mga opisyal (mga direktor, assistant secretaries ngan undersecretaries) nga co-terminous an appointments han naglabay nga administrasyon Arroyo.
Subay han mao nga MC, magpapabilin adton non-career nga mga opisyal ngan han iba pa nga kontraktuwal nga mga empleyado ha serbisyo tubtob Hulyo 31, 2010. (PIA-Eastern Samar) [top]
