Manila (2 July) -- An Malacañang in ha pagkayana naghuhurma han mandameyento ngan kun hain matubtub an autoridad han gintutukod nga Truth Commission nga amo an mag-iimbistigar han mga aligasyon hin corruption ngan pag-abuso han awtoridad dida ha ilarum han administrasyon ni Arroyo.

Dida han pakig-aragtubang ha media kakulop nga adlaw, nagpatapod hi Presidential Spokesperson Atty. Edwin Lacierda nga an commission in diri masulod hin maski ano nga "witch hunting" nga aktibidad, kun diin sering niya nga nagpatapod hi Pangulo Benigno Aquino III pinaagi han pagpalingkod "hin usa katawo nga may integridad ngan waray gin-uugupan" para mangulo han ahensya.

Dida han iya inaugural speech, nagsering hi Pangulo Aquino nga magtutukod hiya hin truth commission nga amo an mag-iimbistigar han mga transakyon nga may anomaliya dida han nakalabay nga administrasyon ngan gintudlok niya hi Supreme Court Chief Justice Hilario Davide Jr. para mangulo han commission.

Sering ni Lacierda nga an commission in mag-iimbistigar ngan magsasampa hin kaso kuntra han mga natutungdan nga mga opisyal han gobyerno, diri la kuntra han anay Pangulo, nga yana Representante Gloria Macapagal-Arroyo han Pampanga.

"Titirukon nira an mga ebidensya, pakukusgon nira an kaso, sugad han sering ni Pangulo Aquino, para ini in mapamatud-an ngan igsusumiti ngadto ha Ombudsman,"sering niya.

Ginklaro ni Lacierda nga gusto han Palasyo nga magin tuptup an commission han ira imbistigasyon para diri matagan an Ombudsman hin lugar para sumiring nga "kulang kamo hin ebidensya."

Nagpatapod an Presidential Spokesperson nga diri angay kabarak-an nga an commission in mapapareho han nahingadtuan han iba nga mga gintukod para mag-imbistigar nga ginkurian pagkuha han mga ginkikinahanglan nga mga ebidensya lab-i na an nagtutudlok kuntra han mga opisyal han gobyerno nga kuno may kalabutan han mga transakyon nga may mga anomaliya.

"Ini in pinaagi la hin pagpakita hin kadesidido. Pababatunon naton hira ngan sasarahan naton an ngatanan nga mga eskandalo nga nanhitabu han nakalabay nga administrasyon. Waray ini katapusan ngan kinahanglan ini matapos para kita in makadus-og," sering niya.