Waray-Waray News: P-Noy umatinder primero nga seremonya pag-isa han bandera ha Malacaņang
Manila (5 July) -- Hi Pangulo Benigno "P-Noy" S. Aquino III in umatinder han iya giuunahi nga seremonya pag-isa han bandera kaupod han mga empleyado han Malacaņang kanina han aga didto ha Kalayaan Hall.
Kaupod han Pangulo dida han okasyon amo hera Executive Secretary Paquito Ochoa ngan Presidential Management Staff Chief Julia Abad.
Dida han iya pagyakan matapos an pagkanta han National Anthem ngan han Panunumpa ngadto han Bandera, nanawagan hi P-Noy ngadto han mga empleyado nga suportahan hiya ngan han iya administrasyon dida han iya pag-atubang han gidadakui nga trabahuon pagpauswag han nasud.
"Sugad han akon sering dida han Miyerkules, an paglakat ha tadong nga kalsada in diri ko mahihimo hin nag-uusahan," sering han Pangulo, ngan dugang pa niya, "Ginkikinahanglan ko an iyo mga bulig, katangkod ha serbisyo ngan pag-intiyende lab-i na ha mga panahon nga diri niyo ako igkakaestorya mahitungod hin kadamo hit akon mga ginhuhuna-huna."
"Ginhahangyo ko ha iyo an iyo pakig-urosa para mas magin klaro ngan buhi an kalag han People Power. Amo ini an nagdara ha aton nganhi ha Palasyo. Nagdadahum ako nga ini gihapon an mabulig ha aton para mahimo naton an aton mga kaangayan nga burohaton," sering niya.
"Magbuburoblig kita para ha kauswagan han mga Pilipino ngan para han maupay nga kabubuwason ha tiarabot pa nga mga hererasyon," sering ni Pangulo Aquino.
Dida gihapon han iya pagyakan, ginpasalamatan ni P-Noy an mga empleyado lab-i na gud adton mga nagserbi ha ilarum ha kanan iya nanay administrasyon ngan ha pagkayana nagtratrabaho para ha iya.
"Duro it akon kalipay nga igkakaurosa ko kamo lab-i na gud an pipira ha iyo nga nakilala ko na hadton nagtratrabaho an akon nanay ngan ha pagkayana igkakaurosa ko liwat," sering ni P-Noy. (Translated by: PIA8/maa) [top]
