Manila (8 July) -- Ipinangamuyo ni Pangulo Benigno C. Aquino III an bendisyon ngan paggiya han Makagarahom nga Dios han panngunahan niya an pagbasa han Pag-ampo para han Nasud durante han Red Mass (Misa para han Baraan nga Espiritu) nga ginbuhat ha Manila Cathedral Miyerkules han aga.

Dida han mao nga pag-ampo, ipinangamuyo han Pangulo nga magka-urosa an mga lider ngan mga opisyal han gobyerno pagtrabaho para han kapulsanan han nasud ngan katawhan bisan ngada ha punto hin pagsakripisyo han ira personal nga mga ambisyon.

Kataliwan han misa ngan pag-ampo, nakiglamano an Pangulo ha mga kaapi han Gabinete, Vice President Jejomar Binay, Manila Mayor Alfredo Lim ngan Supreme Court Chief Justice Renato Corona.

Dida naman han Siyahan nga Pagbasa, pinanginyupo ni Padre Bernas an bendisyon han Makagarahom ngan han Baraan nga Espiritu agud makaghatag hin inspirasyon ngan mapagi-os an bag-o nga mga lider han nasud ha pagpapatuman han ira mga katungdanan tipakadto hin katumanan han mga hingyap han molupyo para hin matadong ngan mapina-iron nga katilingban.

Sumala kan Peachy Yamsuan, direktor han Archdiocese han Manila, gindudumara an Red Mass kada tuig para han mga mahistrado, abogado, propesor hin balaud, estudyante, ngan mga opisyal ha gobyerno nga naghahangyo hin paggiya tikang han Baraan nga Espiritu.