Waray-Waray News: Magpakalilisang nga mga transaksyon ha gobyerno nabukwat
Manila (8 July) -- Ginpahayag ni Pangulo Benigno C. Aquino III hadton Miyerkules nga nakabukwat an iya Gabinete hin pira nga magpakalilisang nga mga iregularidad nga nahisalin han naglabay nga administrasyon Arroyo.
Dida han iya siyahan nga news conference ha mga reporter ha Malacaņang, nagsering an Pangulo nga ginsumatan hiya ni Finance Secretary Cesar Purisima mahiunong hini nga "midnight deals." Kasumpay hini, ginhangyo ni Secretary Purisima nga igre-organisar en maglainlain government-owned and controlled corporations (GOCCs) ngan government financing institutions (GFIs) para matagad ini nga mga iregularidad.
Daw nabaraka hi Purisima pagsumat hini nga isyu ngadto han Pangulo kon diin nasantop nira nga mayda mga transaksyon nga nagkikinahanglan hin pagpahimutang hin tukma nga mga personales agud mapudngan en karat-an ha publiko, sering han Pangulo ngadto han mga peryodista.
Gintalaan han Pangulo ha iya Gabinete en duha ka semana para mag-imbestigar agud magkaada hin klarado ngan kumpleto nga hitsura hini nga mga transaksyon ngan han estado ha pagkayana han ira tagsa-tagsa mga ahensya.
Sigun han Pangulo, posible mahisakop ini nga "midnight deals" dida hiton ginpoporma nga Truth Commission nga panngungulohan ni anay Supreme Court (SC) Chief Justice Hilario Davide, Jr. kondi mayda pipira nga dayag na ngan mayda na abelable nga mga pamatuod salit bangin diri na ini mga kaso dumangat pa ngadto han komisyon ni Davide. (PIA-Eastern Samar) [top]
