Manila (8 July) -- Gin-awhag ni University of the Philippines (UP) College of Law Professor Atty. Harry Roque, Jr. hadton Miyerkules hi anay Department of Agriculture (DA) Secretary Lorenzo "Cito" Lorenzo nga igbuyagyag an ngatanan nga iya nahibabaro-an mahiunong han P728 milyones nga fertilizer fund scam.

Ini nga anomaliya pagtaga-abono an nagin topiko han imbestigasyon han Senado kon paonan-o gintaltag ni anay DA Undersecretary Jocelyn "Jocjoc" Bolante an P728 milyones nga pondo ha abono.

Yana nga binalik na ha nasud hi anay DA Secretary Cito Lorenzo, kinahanglan niya sayuron kon ano an iya partisipasyon dida han fertilizer scam, sering ni Roque dida hin pamakiana ha iya ha radyo.

Nahisumat nga hinkit-an ha diri pa la maiha hi Lorenzo dida hin katitirok han mga suporter ni Pangulo Benigno Simeon "Noynoy" Aquino III ngan ni Vice President Jejomar "Jojo" Binay.

Hi Lorenzo amo an DA Secretary han panahon nga gintaltag ni Bolante palibot han nasud an P728 milyones nga pondo ha abono.

Kinahanglan daw igsumat ni Lorenzo an tinuod nga partisipasyon ni Gloria Arroyo dida hini nga kaso, sering ni Roque.

An anay Pangulo ngan yana Pampanga Rep. Gloria Macapagal-Arroyo amo an nagtudlok ngada ha DA kan Bolante, nga gin-aaligar mayda duok nga relasyon kan First Gentleman Jose Miguel "Mike" Arroyo.

Kon ungod-ungod daw an pagsuporta ni Lorenzo kan P-Noy, kinahanglan boluntaryo hiya nga magtug-an ha Ombudsman, sering ni Roque.

Ginkasuhan hi Bolante ha Office of the Ombudsman (Ombudsman) kasumpay han gin-aaligar nga P728 milyones nga fertilizer fund scam.