Waray-Waray News: 'Investment letdowns' han RP, tratrataron ni P-Noy
Manila (9 July) -- Ginhingadayan ni Pangulo Benigno C. Aquino III hadton Miyerkules an kakulangan ha imprastraktura, paburobag-o nga palisiya han gobyerno ha panmumuhonan ngan bureaucratic red tape komo panguna nga mga problema pan-ekonomiya nga iya tatagdon agud maka-ingganyar hin mga imbestor.
Dida han iya siyahan nga press briefing ngada han Malacaņang Press Corps, nagsering an Pangulo nga agsob nga reklamo han mga korporasyon nga naglalarang manmuhonan ha Pilipinas an makahurobya nga pagproproseso han ira mga aplikasyon ngan iba pa nga mga papeles nga ginkikinahanglan para makagnegosyo ha nasud.
Gintagan niya hin duon an importansya hin diri naghuhuro-ot nga trapiko agud diri madelatar an katawhan partikular na an mga negosyante ha pakadangat ngadto hiton ira mga karadto-on.
Nagsering an Pangulo nga nagbibiling an mga imbestor hin lugar nga maupay pagnegosyohan kon diin madagmit ngan episyente an transaksyones ha negosyo.
Gintagan pa niya hin bug-at an paghimo hin usa nga paborable ha mga imbestor nga situasyon nga asay an makaka-ingganyar hin langyaw ngan lokal nga panmuhonan nga makakahikay naman hin panarabaho-an ha mga Pilipino.
Kinahanglan daw diri hira (an mga imbestor) pakuri-an tungod kay panuyo naton nga magkaada hin trabaho an aton igkasi mga Pilipino, sering han Pangulo.
Gin-aghat niya an katawhan Pilipino nga tratuhon hin husto nga paagi adton mga nabulig ha aton.
Nagpahayag pa an Pangulo nga daku nga bintaha an kamaupay mag-iningles han mga Pilipino nga usa han mga hinungdan kon kay ano ginkokonsiderar an nasud Pilipinas ilabi na para hin business process outsourcing (BPO) nga mga kompaniya. (PIA-Eastern Samar) [top]
