Manila (12 July) -- Iginpahayag han kampo ni Vice President Jejomar Binay nga magpapaluya hiton pagtapod yana han molupyo ngada han proseso han pinili-ay an prostesta nga iginsalawad ni Senador Manuel "Mar" Roxas II kasumpay han resulta han naglabay nga pinili-ay.

Bisan kon hi Senador Roxas en may-ada katungod pagsalawad hin protesta, diri malilikayan nga maapektaran iton kumpyansa han katawhan ngada han proseso han eleksyon, sering han spokesman ni Binay nga hi Atty. JV Bautista.

Nagpapakita gihapon ini nga an darahonon nga waray perdido hiton pinili-ay ha Pilipinas ? mga nalimbongan la, en nagpapabilin pa ha aton kultura, sering ni Bautista.

Naperdi hi Roxas ni Binay han Mayo 10 nga eleksyon hin haros 700,000 botos.

Nakaangkon hi Binay hin 14,645,574 botos, samtang nakakuha hi Roxas hin 13,918,490 botos.

Nagsering hi Bautista nga babaloson nira an protesta ni Roxas ha igo nga panahon ngan waray pa man daw ngani nira kakakarawat an mao nga electoral protest.

Dida han 102 ka paypay nga electoral protest nga ginsalawad ha Presidential Electoral Tribunal (PET) nga ginkokomponer hin mga mahistrado han Korte Suprema, gin-aro ni Roxas en hingpit nga eksplinasyon, labot pa hin iba, han tres milyones nga null votes ngan iba pa nga mga botos nga waray pag-ihapa durante han national canvassing.

Ginhangyo gihapon niya en lagidgid nga pagrepaso han sistema han kompyuterado nga eleksyon tungod han damo nga mga problema-teknikal nga iginkahibalag ugsa, durante, ngan kataliwan han Mayo 10 nga eleksyon.

An mga reklamo nga iginpadangat ni Roxas en pareho nga mga isyu nga ira gihapon iginkwestyon durante han canvassing han mga botos han National Board of Canvassers atubangan han Kongreso han naglabay nga bulan.

Sigun kan Bautista, ginrerespitar nira an katungod ni Roxas pagsalawad hin protesta kondi kon an basaranan han iya protesta amo adton mga "null votes," kinahanglan daw magin andam hi Roxas nga maperdi ha ikaduha nga higayon.

Nagsering hiya nga may-ada hinungdan para han mga null votes. Hi Comelec Chairman Jose Melo pa ngani an nagpakiana kon paonan-o daw maiihap en botos nga diri presente o diri naeksister, sering ni Bautista.