Manila (19 July) -- Nagsering an Malacañang dida han Sabado nga mayda na segurado nga mga pitad nga ginhimo para mapadarudagmit an mga negosasyon parti pangkamurayawan ngadto han mga Muslim ngan mga kumunista nga rebelde.

Dida hin usa nga panmaki-ana han kanan gobyerno Radyo ng Bayan, nagsering an bag-o la nga natudlok nga Presidential Adviser on the Peace Process Secretary Teresita Deles nga nakikita nira nga magtitikang an hurohimangraw pangkamurayawan "ha sulod han masunod nga quarter."

Nagsering hi Deles nga an kanan gobyerno pagkamurayawan nga hugpo in ha pagkayana gin-uorganisa ha pagsunod han karuyagon ni Pangulo Benigno A. Aquino nga magkaada hin "murayaw ngan maupay nga sarusarabot parti hini nga kasamok" ha pinakamadali nga panahon.

"An akon gobyerno in sinsero ha pakigsarusarabot ha ngatanan nga katawhan han Mindanao. Kumitido kami ngadto hin murayaw ngan patas nga pakigsarusarabot han mga kasamok, kun diin upod an mga interes han ngatanan - hera man in magin Lumads, Bangsamoro o mga Kristiyano," sering han Pangulo dida han iya inaugural nga pagyakan han Hunyo 30.

"Salit magdadahum kita nga tikangan utro an hurohimangraw ngan magigin seryoso ngan intensibo ini para magkaerintyendihay kun ano gud an gintikangan hini nga mga sarusaramok ngan kun ano an kapabilidad han duha nga hugpo para mabaton ini nga problema," sering ni Deles.

Sering niya nga an lima-katawo nga makumponi han kanan gobyerno grupo han pangkamurayawan nga panangunguluhan ni Dean Marvic M.V.F. Leonen han UP College of Law in mapuporman na ha diri maiha nga panahon pag-andam han exploratory nga hurohimangraw.

Nagpasabot hi Deles nga an mga nominado ngadto han grupo in ginpipili gud hin maupay, kaupod han magigin mga consultants ngan third party facilitators para makaseguro nga makakaporma hin makusog ngan aktibo nga hugpo nga makikipagnegosasyon.

Dugang pa niya nga an mga ngaran han makumponi han opisyal nga hugpo han negosasyon in igpapagawas dida kun opisyal na gud nga maporma an grupo.

"Gusto namon nga magkaada hin balanse nga hugpo kun diin may marepresentar para han katawhan nga tim-us nga nakakaintiyendi han mga isyu," pagklaro ni Deles.

Myentras an opisyal han Palasyo in nadiri paghatag hin eksakto nga oras pagkumpleto han mga preparasyon, sering niya nga pwede man magtikang yana hin diri opisyal nga hurohimangraw.