Waray-Waray News: PNoy ginkarawat an representante san Presidente san Estados Unidos
ni Ailene N. Diaz
Manila (21 July) -- Si Presidente Benigno C. Aquino III nagkita ngan san US State Department Undersecretary for Political Affairs William Burns kahapon sa Palasyo sa Malakanyang.
Si Burns an nakapot san pinakahitaas nga ranggo sa kabug-usan nga career ambassadors sa State Department ngan sa yana an pinakahitaas nga opisyal san Estados Unidos nga nakigtapo kan Presidente Aquino tikang siya nag asumer sa iya opisina sa Hunyo 30.
Sa iya pakig esturya san mga reporters san Palasyo katapos nira magkita ni Aquino,, si Burns nasugad nga an kanya pagbisita naghahatag bug-at san kan US President Barack Obama determinasyon nga ma renew ngan mapahiluag an partnership san Estados Unidos ngan Pilipinas.
Durante sa kanya pagbisita, gin tukib ni Burns ngan Presidente Aquino an mga isyu kaapi na an bilateral relations, ASEAN concerns ngan mga pitad san bag-o nga pangobyernohan san Pilipinas dida san pagpaubos san kapobrehan, panlawas, edukasyon, pantrabahuan, proteksyon san katungod san katawhan, reporma san hustisya, pagpauswag san accountability ngan transparency. Gin esturyahan liwat nira an kahimtang san US Development Assistance ngadi sa nasud labi na sa Mindanao kon diin nakatalaan bisitahon ni Burns.
Gintagab bug-at ni Burns nga an Estados Unidos karuyag himuon an ngatanan dida san panlawas, sa pag uswag ngan san ngatanan nga aspeto kon diin ira gin kikit-an nga importante para makaghimo sin maupay nga kabubuwason san katawhan sa Pilipinas. (PIA-Northern Samar) [top]
