Manila (26 July) -- Natuo an an Malacañang nga an mga sinakopan ni Rep. Gloria Macapagal-Arroyo an aada ha pinakamaupay nga lugar ha pagtirutimbang kon makatadunganon ba an desisyon han ira representante nga diri tumambong han State of the Nation Address (SONA) ni Pangulo Benigno Aquino III.

Amo ini an pahayag ni Communications group official Herminio 'Sonny' Coloma nga nagsering pa nga obligasyon ni Rep. Arroyo nga magin presente hiton SONA para hiton iya mga sinakopan ha Pampanga komo ginrerepresentaran niya ha Kongreso. Kondi kon natuo daw hiya nga mayda pa mas-importante nga mga butang nga kinahanglan niya tutokan, sugad hiton pag-ataman han balati-an han iya asawa, aada na daw hiton iya mga sinakopan an pagdesider kon husto ba ini o diri, sering ni Coloma.

Nakatalaan an primero nga SONA ni Pangulo Aquino yana nga adlaw Hulyo 26 kadungan hiton pag-abre han ika-15 nga Kongreso.

Nahisumat nga diri makakatambong hi Mrs. Arroyo hini nga SONA para maupdan hi anay First Gentleman Mike Arroyo ha Hong Kong.

An sugad nga mga notisya en nakapabutho naman hin mga hurobhurob nga gintuyo han magti-ayon nga lumarga ngadto ha Hong Kong para malikayan ni Mrs. Arroyo an pagtambong han SONA kon diin igbubuyagyag ni Pangulo Aquino dida hiton iya pamulong an gin-aaligar nga mga anomaliya durante han administrasyon Arroyo.

Ginkumpirmar na han Malacañang nga mahihingadayan dida hiton SONA an mao nga mga anomaliya sugad man han mga solusyon nga paghihimuon ngada hiton mga problema nga gin-aatubang han nasud.

Igbubuyagyag han Pangulo an mga anomaliya nga nabukwat han mga kaapi han iya Gabinete, sering ni Coloma.

Gindiwara naman han kampo ni Mrs. Arroyo nga iginkakahadlok han anay Pangulo an SONA ni PNoy.

Sumala kan Atty. Raul Lambino, spokesperson han koalisyon han Lakas-Kampi nga amo naman an partido-politikal ni Mrs. Arroyo, ginikan daw an magti-ayon ngadto ha Hong Kong hadton Domingo tungod nga igintalaan han mga espesyalista didto an Huly 26 para han konsultasyon-medikal ni Mr. Arroyo.

Nagsering hi Lambino nga mayda sakit ha kasingkasing hi Mr. Arroyo ngan natuo an pamilya Arroyo nga nagkikinahanglan gud ini hin mahugot nga obserbasyon.

Natuo naman an Malacañang nga bisan pa man diri umatender hi Mrs. Arroyo, diri daw hini mababalhin an kamatuoran, an mga anomaliya nga nabuhat durante han iya administrasyon en mapapara, sering ni Coloma.

Iginpatapod niya an kamatinud-anon han SONA, nga sering niya ginhurma an unod hini tikang han ginsumiter nga mga report han mga kaapi han Gabinete ngadto kan Pangulo Aquino.