Ilocano News: CCTV camera kadagiti business establishments iti Candon City naisingasing
By Ben Pacris
Vigan City (1 October) -- Kimmaro ti mapaspasamak a panagtakaw kadagiti pasdek iti negosio iti Candon City a maipagarup a gappuanan dagiti kameng ti Acetelin gang. Daytoy ti inreport ni Bokal Nestor Itchon, presidente ti Councilors League Ilocos Sur Chapter bayat ti naang;ay a session ti Provincial Board tay lawasna.
Mairaman a nabiktima a sinerrrek dagitoy a robbery group isu ti duwa a pawn shop ken maysa a a banko iti sentro ti Candon kuna ti bokal. Insingasingna iti Provincial Board babaen iti maysa nga ordinansa a nasken amakaptan iti CCTV camera ititunggal business establishment iti siudad tapno mai-video dagiti makinggappuanan kadagiti panagtakaw.
Iti napasamak a robbery iti maysa a pawnshop iti poblacion iti Candon idi rabiit ti Setiembre 25 nagna dagiti mannanakaw iti uneg ti daga wenno tunnel a kutukotda. Intalawda dagiti alahas ken cash a saan pay ammo no mano ti gatadna.
Naibilin kadagiti kameng ti PNP ken Barangay Tanod tii Candon ti panagalertoda iti panagpatrolia iti rabii kadagiti business establishments. (PIA Ilocos Sur) [top]
