Ni Ben Pacris

Vigan City (7 October) -- Para iti pagimbagan dagiti umili iti Ilocos Sur ken pagdur-asan iti probinsia, agkamangton dagiti local officials nga idadulluan ni Gob. Luis "Chavit" Singson ti LP, ti administration party ni Presidente Benigno Aquino III.

Daytoy tin waragawag ni Gob. Chavit bayat ti naangay a Kapihan iti Amianan Media Forum itay lawasna iti Baluarte a naipabuya iti IHC channel 16.

'Posible nga agkamangkami iti LP," kuna ti gobernador iti masaludsod kenkuana mo mapanen iti Liberal Party." Ngem pagsasaritaan ken adalento a nalaing," innayonna.

Kuna ti dati a deputy national security adviser bayat iti rehimen Arroyo a kas kuna daydi Presidente Marcos "in politics all are temporary allies."

Kuna ni Gob Singson a gayyemna unay daydi Senador Benigno Aquino, Jr ti ama ti Presidente. Idi damo ni Gob Chavit a simrek iti politika nagkameng iti ti LP inggana a kimmapsut ti puersa ti partido.

"Um-umay idi ni Ninoy iti Ilocos Sur ken adda pay privilege speechna idi iti Senado maipapan iti probinsia," kunana.

Mamati pay ti gobernador a saan a mabaybay-an ti RA 7171fund babaen ti administrasion ni Presidente Noynoy Aquino. Ni Gob Singson, dati a kongresman isu ti autor ti RA 7171 a namagbalin ti Ilocos Sur a kas first class province.