Hiligaynon News: Palasyo kumpiyansa sa plano sang pagpreparar sa tion sang peligro
Manila (19 October) -- Kumpiyansa ang Malakanyang nga matagaan pagtamod sang inter-agency nga plano sa pagpreparar sang gobyerno sa posible nga halit nga mahatag kag ibilin sang super typhoon Juan.
Sa pagtililipon sang National Disaster Risk Reduction Management Council (NDRRMC) sa Kampo Crame, ginhambal ni executive secretary Paquito Ochoa Jr. nga kumpleto ang pagpreparar nga ginplastar sang nagkalain-lain nga ahensiya para tagaan pagtamod ang halit nga dala sang bagyo nga Juan, ilabi na sa mga probinsiya sang Cagayan, Kalinga, Mountain province kag Ifugao.
Ginpabutyag naman ni Social Welfare and Development secretary Corazon "Dinky" Soliman nga may kadamuon nga 3,832 nga mga boluntaryo ang nabutang sang ahensiya para buligan kag dumalahan ang pagpanghatag sang mga bulig sa mga rehiyon I, II, III, IV-A, IV-B, V, National Capital Region (NCR) kag Cordillera Administrative Regions (CAR).
Nakapreparar man ang natigana nga pondo nga nagakantidad sang mga P3 milyones halin sa Preposition Emergency Relief Resources para sa mga apektado nga lugar kag ang dugang nga pondo nga tig P500 mil para sa Cordillera region kag Region 1 kag isa ka milyon para sa Region 2.
Padayon man ang 24/7 nga operasyon sang National kag Regional Disaster Response Operation Monitoring and Information Centers para sa pagpangita sang impormasyon kag koordinasyon sa Opisina sang Civil Defense. (EBdelaCruz/aca/PIA12) [top]
