Ilocano News: Nasayaat a makan panglapped ti panateng, trangkaso
Ni Imelda C. Rivero
Vigan City (29 October) -- Makan, saan a tableta a bitamina. Daytoy ti nasaysayaat nga ipauneg tayo tapno mapengdan dagiti sakit ket agtalinaed ti napintas a salun-attayo.
Segun kadagiti panagsukisok ti makan ti nabilbileg a pangsalluad ti tao iti bagina tapno malapdan ti panagsakitna. Maala kan ngamin ti sibubukel a pakete ti nutrision manipud kadagiti makan segun kenni Dr Lisa Hark, RD, director ti Nutrition Educational and Prevention Program ti University of Pennsylvania School of Medicine.
Ti maysa a bukel ti orange ket nasaysayaat ngem ti tableta ti vitamin C ta ti orange ket mangted pay kadagiti dadduma a nutrients kas ti magnesium, potassium, folate, vitamin B6 ken ti antioxidant flavonoids. Saan nga ipakita dagiti panagsukisok a ti panagtumar ti vitamin C ket tumulong a manglapped ti panateng wenno trangkaso. Ngem ammotayo a ti pannangan kadagiti presko a prutas ken nateng a nangato iti vitamin C ket papigsaenna ti immune system.
Ti ngamin immune system ti mangsalluad ti bagi manipud viral infections ket dagiti makan ket dakkel ti epektoda iti abilidad ti immune system a manglaban iti panateng ken trangkaso. Adda pay ngamin vitamins A ken E ken flavonoids dagiti prutas ken nateng isu a napigpigsada a manglaban iti panateng ken trangkaso. Kasapulan ti lima (5) a servings ti prutas ken nateng ti inaldaw tapno agtalinaed a nasalun-at ti immune system. (PIA Ilocos Sur) [top]
