Ilocano News: Protina para ti natibker a bagi iti sports
Ni Imelda C. Rivero
Vigan City (29 October) -- Iti Estados Unidos ken dadduma a pagillian ti protein milkshakes a naaramid manipud ti protein powder ken gatas ket masansan a maus-usar a bodybuilding supplement.
Importante ti protina a parte ti kada selyula ti bagi. Dagiti buok ken kuko ket naaramid iti protina. Us-usaren ti bagi ti protina nga agaramid ken mangtarimaan kadagiti tissues. Mausar pay a pagaramid kadagiti hormones ken dadduma a kemikal iti bagi. Importante pay nga agaramid iti tulang, laslasag wenno muscles, cartilage, kudil ken dara.
Adda dagiti panagadal a mangibagbaga a masapul ti panagipauneg iti 2.2 g/kg a protina para kadagiti naikappeng iti competitive wenno intense recreational sports a kayatna a maaddaan ti lean body mass ngem dina kayat ti dumagsen. Ti 2005 Recommended Dietary Allowances (RDA) a nakapokus kadagiti nataengan ket masapul ti 0.8-1 gram ti protina per kilogram ti kinadagsen (BMI formula). No pay kasta agdidiperensia ti kaado ti kasapulan ti bagi gapu ta agduduma met ti pakasapulan ti protina ti bagi.
Dandani amin a karne kas ti manok ket addaan ti essential amino acids a masapul ti tao. Ti protina ket aggapu iti karne, tofu ken dadduma a produkto ti soy, itlog, bukbukel ken dairy products kas ti gatas ken keso. Ti sobra nga amino acids manipud protina ket agbalin a glucose ket mausar a fuel babaen ti gloconeogenesis. Dagiti nagbati nga amino acids ket maibelleng. (PIA Ilocos Sur) [top]
