Cebuano News: SK mitinguha sa fiscal autonomy
by Roberto M. Cabardo
Cebu City (13 November) -- Gitinguha sa National Federation sa Sangguniang Kabataan ang pag-usab sa balaod nga nagmugna sa SK aron libre na sila nga makapagawas sa pondo nga dili kapugngan sa mga kapitan.
Kini maoy pamahayag sa SK Reform Bill Chair Jeneda Salcedo nga mao usab ang SK Provincial Federation President sa Iloilo atol sa Kapihan sa PIA kagahapon.
Matud ni Salcedo, ang mga kapitan nga dili kaalyado sa SK Chairman sa ilang lugar sagad nga mobabag sa mga proyekto nga buot ipatuman sa mga opisyal sa SK.
Matud niya, ang fiscal autonomy mao ray paagi aron klaro nga hatagan og gahum ang mga mga kabataan pag-implementar sa ilang mga proyekto.
Si National Youth Commissioner for the Visayas Benjie Oliva sa iyang bahin, niingon usab nga kinahanglan kining maong paagi aron ang mga SK magmalampuson dinhi sa nasod.
Ang National President sa SK Federation nga si Milton Mendador nibutyag usab nga mga 60 porsiyento sa SK sa nasod ang nakasinati og problema sa ilang kapitan og konseho nga mopugong sa pag-release sa ilang pondo.
Gawas sa pagpangayo og fiscal autonomy, gitinguha usab sa SK Reform Bill ang pagpalapad sa edad sa mga kabatan-onan nga nga pwedeng modagan isip opisyal sa SK gikan sa 18-21 anyos. (PIA 7) [top]
