Cebuano News: ASEAN Summit security arrangement 90% nang andam
by Roberto M. Cabardo
Cebu City (20 November) -- Gibutyag sa opisyal sa kapolisan sa rehiyon nga 90 porsiyento nang hapsay ang security plan sa umaabot nga ASEAN Summit dinhi sa Sugbo sunod bulan.
Kini maoy gibutyag ni PRO 7 Deputy Director for Operations P/SSupt. Lani O. Nerez sa interbyu ning tigbalita.
Sa dihang gipangutana kung ngano nga 90 porsiyento ra, si Nerez nitubag nga kini tungod kay aduna pa may dugang "polishing" o pagpahapsay pa gayud nga gihimo nila sa pagkakaron.
Sa nasayran, ang ASEAN Summit ning tuiga gikatakda nga mahitabo sa Sugbo karong umaabot Disyembre 11-14 sa Shangri-la Mactan Island Resort og sa Cebu International Convention Center (CICC).
Gibana-bana nga 17 ka mga lider sa mga nasod nga miyembro sa Association of Southeast Asian Nations (ASEAN) ang motambong sa maong kalihukan.
Gawas sa mga lider sa ASEAN member nations, aduna say motambong nga duol tres mil ka mga delegado sa ubang nasod og mga langyaw nga sakop sa media ang mosaksi sa maong kalihukan.
Tungod sa kabililhon sa summit sa natad sa turismo og kalambuan sa Sugbo og sa Pilipinas, mas gipalig-on pa gayud karon sa kapolisan og kasundaluhan ang ilang pwersa alang sa kaluwasan sa mga heads of states og uban pang mga bisita--lokal man o langyaw. (PIA Cebu) [top]
