Cebuano News: DOT miklaro nga way kontrol sa pagsaka sa rates sa mga hotel sa Sugbo
by Roberto M. Cabardo
Cebu City (20 November) -- Ang Department of Tourism niklaro nga wa silay kontrol sa pagsaka sa mga room rates sa mga hotels og resorts sa Sugbo.
Kini maoy tubag ni DOT Undersecretary Phineas Alburo sa pangutana kung unsay mahimo sa departamento sa turismo kabahin sa reklamo sa pipila ka mga delegado sa ASEAN Summit sa kalit nga pagsaka sa mga bayranan sa hotels og resorts dinhi.
"Wa man mi kontrol ana. Sa time sa martial law, nikontrol ta ana, apan karon, wala na," matud ni Alburo.
Si Alburo nga maoy guest atol sa Lintunganay Public Service Portion sa DYLA karong buntag nga gidumala ni Fred Languido inabagan sa PIA og Association of Government Information Officers (AGIO) dinhi sa tunga-tungang Kabisay-an.
Pipila sa mga hotel og resort owners nibutyag usab nga usa sa katarungan sa ilang pagpasaka sa mga bayranan mao ang ilang tinguha pagbawi sa ilang dakong gasto pagpaayo o kaha pag-renovate sa ilang mga hotels og resorts isip kabahin sa pagpangandam sa paghatag og mas maayong pag-abi-abi sa mga bisita sa Sugbo sa ipahigayon nga ASEAN Summit sunod bulan. (PIA Cebu) [top]
