Ni Ben Pacris

CANDON City (16 July) -- Ad-adu pay nga umili nangruna dagiti nakukurapay a pamilia iti Ilocos Sur ti maipaayan iti Philhealth card tapno masagrapda ti libre a serbisio medical kadagiti ospital iti probinsia nga accredited ti Philippine Health Insurance a kas tulong ti gobierno.

Kinuna ni Diputado Eric Singson a mapadur-as daytoy a programa a prioridad dagiti nakukurapay a pamilia tapno masagrapda ti libre nga agas ken libre a pannaka-ospital aglalo kadagitoy a tiempo a nangina ti singir kadagiti ospital.

Iti naangay a press conference iti pagtaenganna itay nabiit, kinuna ni Congressman Singson a 30 porsiento kadagiti nakukurapay a pamilia iti populasion iti tunggal ili iti probinsia ti seknan dauytoy a programa iti daytoy a tawen.

Ti mabayadan a premium pagbibingayan ti provincial government nga idauluan ni Gobernador Deogracias Victor (DV) Savellano, ti Congressional Office ken dagiti maseknan a Local Government Units (LGUs).

Kinuna ti diputado iti maikadua a distrito nga adda dagiti il-ili iti probinsia a naipaayandan ti 80 porsiento kadagiti indigents iti luglugarda ti philhealth card a maaramatda no maospital dagitoy.

Kabayatanna, inwaragawag pay ti Depurty Speaker iti Kongreso a mawarasan iti 100 a bags ti semento ti amin a barangay iti Ilocos Sur tapno maaramatda para iti small irrigation project, solar drier ken barangay roads. Manipud iti self health program ti 20 porsiento a development fund ti barangay, mabalinda a paggatang iti darat ken graba para iti proyekrto ti kalsada iti barangayda.

Makitinnulong pay ti provincial government a mangnayon pay iti daytoy 100 a bags ti semento a maiwaras iti barbarangay tunggal tawen a makatulong unay para iti pagdur-asan ti barbarangay, kinuna ni Congressman Singson.

Iti benneg ti agrikultura, kinuna pay ti diputado a maipakat ti "buy one take one" iti organic fertilizer para kadagiti lehitimo a mannalon iti maikadua a distrito. No gumatangda iti dua nga bags ti organic fertilizers dua met ti maited a libre kadagitoy a maseknan a mannalon.

Dagiti laerng lehitimo a mannalon nga inlista ti Department of Agriculture ti mabalin a pakaipaaayan daytoy a programa tapno maliklikan ti pananggundaway dagiti negosiante wenno saan a mannalon., kinunana.