Naval, Biliran (October 24) -- Ang buhatan sa Department of Environment and Natural Resources (DENR) sa kauluhan lakip na ang ilang mga buhatan sa mga rehiyon ug mga probinsya sa tibuok nasud uban na ang probinsya sa Biliran naglunsad sa programa nga "Bantay Ibon" aron malikayan nga ang tibuok nasud Pilipinas ug ang mga probinsya dili maapektohan sa bird flu.

Kini gihisgutan durante sa duha ka adlaw nga seminar mahitungod sa Avian Inlfuenza nga gihimo didto sa Sabin Hotel Resort sa Ormoc City sa ninglabay'ng semana diin ang mga regional information officers, mga station managers sa radyo, media lakip na ang mga provincial information managers sa Philippine Information Agency dinhi sa rehiyon 8 ang ning tambong.

Bisan pa man gideklarar na nga luwas ang nasud Pilipinas dinhi sa tibuok Asya sa bird flu, apan sumala pa sa DENR samtang wala pa ang nasud maapektuhi niini, ang maong katalagman kinahanglan pangandaman na, dugang ang pag-ingon nga lihok kitang tanan aron atong mamantener ang nasud Pilipinas nga "bird flu free".

Ang DENR nagpahimatngon nga kung aduna'y daghang pagkamatay sa mga langgam nga maobserbaran, kinahanglan kini i-taho ngadto sa ilang buhatan o sa pinakaduol nga government veterinarian aron masusi ang hinungdan niini.

Ang pag smuggle o ilegal nga pagbaligya o pagpalit sa mga exotic birds o mga langgam nga dili native dinhi sa Pilipinas ug uban pang mga wildlife ang hugot nga dili sa balaud.

Sa pagkakaron nga aduna pa'y hulga sa bird flu, ang pag-import o pagpalit gikan sa gawas ug mga wildbirds gisuspendir kutob nga aduna na'y pagtugot sa ulahing mga panahon.

Ang pag smuggle ug ilegal nga pagbaligya sa mga wildlife makadugang sa kakuyaw sa bird flu.

Ang katawhan mahimong molihok sa pagpugong sa Avian Influenza o kon bird flu pinaagi sa pagbantay sa atong mga wetlands ug pagdumala ug wildbird watch, pagbantay sa mga entry ports alang sa mga illegally transported nga exotic nga langgam ug ubang mga wildlife nga gikan sa mga nasud nga infected na sa bird flu.