Ilocano News: 50 porsiento nga super regions projects nalpasen
By Jessie R. Valdez
San Fernando City, La Union (27 October) -- Iti unos iti tallo a tawen pay a panagturay ni Presidente Gloria Macapagal Arroyo ditoy Pilipinas, kayatna nga malpas aminen dagiti super regions nga proyekto kas nailanad iti State of the Nation Address na idi 2006.
Itay nabiit, binagaan ni Presidente ni DPWH Sec. Hermoneges Ebdane, Jr. nga partakan koma ti pannakaleppas dagiti dadakkel nga imprastraktura a proyekto tapno dagiti umili ket mabenepisyuan dan.
Impasigurado ni Ebdane ken Presidente nga dagiti prioridad a proyekto ket makumpleton ton no tawen 2010 ket kadagitoy met a tiempo 50 a porsienton ti naileppas.
Babaen iti 2006 nga SONA ni Presidente, adda lima nga sub-economic regions a naporma isu ti North Luzon Agribusiness quadrangle, Luzon Urban Beltway, Central Philippines & Mindanao Super Regions, ken ti Cyber Corridor.
Kuna ni Ebdane nga babaen kadagiti super regions a binukel ni Presidente Arroyo, dakkel a pagrang-ayan ti pagilyan nga maited kadagiti umili babaen kadagiti pisikal nga imprastraktura, panangpasayaat ti human capital ken talna kadagiti kummunidad.
Innayon na pay a kinuna nga riniwriw ti busbusen a kuarta kadagitoy nga proyekto ngem pagimbagan tay amin a gapuanan ti pinansial a kasasaad, macro-economic a kondisyon ti pagilian, panangpaksiat terorismo ken nadalus a Pilipinas. (PIA La Union) [top]
